*

miðvikudagur, 28. október 2020
Fólk 6. október 2020 13:07

Rafn Franklín í hópinn hjá Pure Natura

Rafn Franklín Johnson er nýr sölu- og markaðsstjóri Pure Natura auk þess að hann er kominn í hluthafahóp fyrirtækisins.

Ritstjórn
Rafn Franklin Johnson hefur starfað sem einkaþjálfari í Hreyfingu en tekur nú við sem sölu- og markaðsstjóri Pure Natura sem framleiðir bætiefni úr innmat íslenskra lamba.
Aðsend mynd

Rafn Franklín Johnson er orðinn einn hluthafa íslenska bætiefnaframleiðandans Pure Natura og mun jafnframt gegna stöðu sölu- og markaðsstjóra fyrirtækisins. Rafn Franklín er þjálfari og heilsuráðgjafi í Hreyfingu í Glæsibæ og eigandi hlaðvarpsins 360 Heilsa.

Rafn Franklin hefur starfað sem einkaþjálfari í Hreyfingu frá árinu 2014 en frá árinu 2019 hefur hann verið yfirmaður einkaþjálfunar í líkamsræktarstöðinni. Áður starfaði hann sem umsjónarmaður á Sóltúni og sölufulltrúi í Smáraveri.

Árið 2019 kláraði hann nám í næringarfræði, heilsu og vellíðun frá Functional Nutrition Lab, en á árunum 2016 til 2019 lærði hann við CHEK Institute, þar sem hann tók stig 2 í hreyfingarvísindum og lífsstílsþjálfun, auk heilsu og líkamsræktarþjálfun.

Nota íslenskar jurtir og innmat úr lömbum vegna hreinleika

Pure Natura ehf. er íslenskt sprotafyrirtæki sem stofnað var árið 2015 og framleiðir bætiefni úr innmat-og kirtlum sláturdýra í bland við íslenskar villijurtir. Fyrirtækið nýtir aukaafurðir sem falla til við slátrun lamba á haustin og byggir þannig sérstöðu sína á hreinleika íslenskra landbúnaðarvara.

Þar sem íslensk lömb ganga laus í afréttum alla sína ævi er kjötið sagt vera án aukaefna svo sem sýklalyfja, hormóna og skordýraeiturs, sem gefi íslenska lambinu sérstöðu sem varla þekkist annars staðar í heiminum að því er segir í fréttatilkynningu. Jurtirnar sem Pure Natura nýtir eru jafnframt sagðar vera þekktar lækningajurtir sem byggja á aldagömlum hefðum.

„Ég hef gríðarlegan áhuga á öllu sem viðkemur heilsu, og þá sérstaklega hvernig mismunandi lífsstílsþættir eins og mataræði hafa áhrif á heilsu fólks. Ég fylgist vel með því sem er að gerast í þessum heimi og allt frá upphafi hlaðvarpsins míns hef ég unnið með Pure Natura, vegna þess að fyrirtækið er einfaldlega með eina öflugustu fæðubótina á markaðnum,“ segir Rafn Franklín Johnson.

„Með því að blanda saman öflugum jurtum og innmat sem inniheldur ótrúlegt magn af næringarefnum hefur Pure Natura náð að skapa hina fullkomnu fæðubót að mínu mati. Ég er bæði stoltur og spenntur að fá tækifæri til að koma inn í þetta fyrirtæki og leggja mitt af mörkum við að efla heilsufar fólks og um leið að bæta nýtingu íslenskra landbúnaðarafurða, stuðla að sjálfbærni og styðja við íslenska framleiðslu.“