Rafrænt eftirlit fanga sparar um 55 milljónir í ár. Páll Winkel, forstjóri Fangelsismálastofnunar, segir í viðtali við Vísi að rafrænt eftirlit hafa gengið glimdrandi og að hann eigi von á að þetta verði rýmkað frekar.
Í október 2011 tók breyting á lögum um fullnustu refsinga gildi sem gerði föngum kleift að afplána síðasta hluta refsingar sinnar heima undir eftirliti. Í apríl 2012 var svo fyrsta ökklabandið fest á fanga.Páll segir í viðtalinu að þetta spari þjóðfélaginu heilmikið og að svo sé þetta eðlileg framþróun í þessum málefnum því það bæti engan að vera innilokaður.
Eins og Viðskiptablaðið greindi frá 12. júní er kostnaður við hvern fanga að meðaltali 7,3 milljónir á ári, en mikill munur er á milli fangelsa hve hár kostnaðurinn er. Rafrænt eftirlit er ódýrast og kostar einungis 1,8 milljón á ári í samanburði. Að sögn Páls eru nú tíu fangar með slík bönd. Kostnaður við þau nemur því 18 milljónum í ári í samanburði við 73 milljónir ef fangarnir væru innilokaðir.
Lögin um rafrænt eftirlit virka þannig að sá sem hefur hlotið eins árs óskilorðsbundinn dóm getur afplánað síðasta mánuðinn undir þessu eftirliti. Þannig ef dómurinn er fimm ár getur fangiinn afplanað fimm mánuði með þessum hætti og svo framvegis. Lengst verður hægt að afplána átta mánuði ökklabundinn í samfélaginu.
Þetta úrræði mun ekki vera í boði fyrir alla til dæmis má fanginn ekki hafa brotið gegn börnum, né eiga útistandandi mál hjá lögreglu, ákæruvaldi eða dómstólum.