Ragnar Kjartansson, myndlistarmaður hefur verið valinn til að sýna fyrir Íslands hönd á tvíæringnum í Feneyjum árið 2009. Feneyjatvíæringurinn er einn helsti viðburður á alþjóðlegum myndlistarvettvangi.
Þorgerður Katrín Gunnarsdóttir, menntamálaráðherra tilkynnti um fulltrúann á upplýsingafundi um Tvíæringinn í Listasafnin Íslands fyrir skömmu.
Í fréttatilkynningu vegna tilnefningarinnar segir að með vali Ragnars tefli Ísland fram ungum listamanni sem hefur á skömmum tíma byggt upp eftirtektarvert höfundarverk og sýningarferil. Hann er verðugur fulltrúi þess gróskumikla myndlistarlífs sem nú blómstrar í landinu auk þess sem verk hans hafa sterkar tilvísanir í menningarlegar hefðir, sögu og sammannlega reynslu.
Sýningu Steingríms Eyfjörð, fulltrúa íslendinga á Feneyjatvíæringnum 2007, lauk í gær.
Val á fulltrúa Íslendinga á Feneyjatvíæringinn 2009 var í höndum fagráðs Kynningarmiðstöðvar íslenskrar myndlistar, en fagráðið skipa: Christian Schoen, forstöðumaður Kynningarmiðstöðvarinnar, Hafþór Yngvason, forstöðumaður Listasafns Reykjavíkur og Rúrí, myndlistarmaður. Gestir nefndarinnar við valið voru Halldór Björn Runólfsson, forstöðumaður Listasafns Íslands, og Kristján Steingrímur Jónsson, deildarforseti myndlistar í Listaháskóla Íslands.
Kynningarmiðstöð íslenskrar myndlistar hefur umsjón með þátttöku Íslendinga í Feneyjatvíæringnum.
Myndir og myndbönd af ýmsum eldri verkum Ragnars má skoða á slóðinni:
www.ragnarkjartansson.com
