Ragnar Skúlason hefur verið ráðinn til Póstsins, þar sem hann mun sinna starfi teymisstjóra hugbúnaðarþróunar í upplýsingatæknideild og hefur þegar hafið störf.

Ragnar er með 16 ára reynslu og þekkingu úr hugbúnaðargeiranum, en síðast starfaði hann hjá Meniga sem tæknilegur verkefnastjóri yfir innleiðingum.

Þá hefur Ragnar meðal annars starfað sem teymisstjóri framendaþróunar hjá Nova og sem hugbúnaðarverkfræðingur hjá TM Software og GreenQloud. Ragnar er með MSc próf í hugbúnaðarverkfræði frá Háskóla Íslands.

„Það er ótrúlega spennandi að koma til Póstsins á þessum tímum. Fyrirtækið er í mikilli sókn, ekki síst þegar litið er til tæknilausna og hugbúnaðarþróunar,“ segir Ragnar.

„Ég hlakka mikið til að taka þátt í þeim verkefnum sem þegar eru í vinnslu ásamt því að taka þátt í þeim fjölmörgu verkefnum sem eru framundan hjá okkur. Það má með sanni segja að Pósturinn ætli sér stóra hluti í tæknilegum úrbótum á næstu misserum og það verður gaman að fá að taka þátt í því að bæta og í raun umbylta þjónustu fyrirtækisins til framtíðar.“

Georg Haraldsson, forstöðumaður stafrænnar þjónustu og upplýsingatækni hjá Póstinum, segir hreint frábært að fá Ragnar til liðs við póstinn því hann hafi mikla reynslu sem nýtist vel í þeim verkefnum sem framundan séu hjá fyrirtækinu.

„Við erum ætlum okkur að bæta þjónustu fyrirtækisins til muna á næstunni, sem að miklu leiti er byggt á tæknilausnum, og leggjum mikla áherslu á að fá öfluga einstaklinga til liðs við okkur til að láta það verða að veruleika. Að fá Ragnar til liðs við okkur er svo sannarlega mikill fengur og við hlökkum mikið til að vinna með honum og nýta reynslu hans sem mun gera okkur enn skilvirkari þegar kemur að þróun hugbúnaðarlausna,“ segir Georg.