„Það er nú ekki hægt að taka undir það að kjör fólks í ferðaþjónustu séu yfir höfuð léleg," segir Helga Árnadóttir, framkvæmdastjóri Samtaka ferðaþjónustunnar í samtali við fréttastofu Ríkisútvarpsins . Hún segir rangt sem hafi verið haldið fram að kjör ungs fólks í geiranum séu sérstaklega léleg.

Bent hefur verið á að í nýjum kjarasamningi SA og verkalýðsfélaga er samið um að ungt fólk á aldrinu 18-20 ára skuli starfa á sérstökum unglingataxta. Margir á þessum aldri vinna nú í ferðaþjónustu. Helga segir ekki rétt að staða ungs fólks í ferðaþjónustu sé lakari en í öðrum geirum.

„Einhverjir eru jú á lágmarkslaunum eins og gerist í öðrum atvinnugreinum en það er einmitt hvati þá að halda áfram, því eitthvað hefur verið um brottfall eftir stuttan tíma, að halda mönnum innan fyrirtækjanna og þannig að öðlast frekari reynslu, þannig að menn eru þá að fá ábata aftur eftir sex mánuði eða hækkun launa þannig að þetta á allt saman að haldast í hendur og vera hagur beggja vil ég meina í þessum nýju samningum," segir Helga Árnadóttir.