Breski auðkýfingurinn og Íslandsvinurinn Jim Ratcliffe trónir á toppi lista Financial times yfir hundrað fremstu frumkvöðla Bretlands. Listinn tekur saman frumkvöðla sem hafa byggt stórfyrirtæki eða eða í það minnsta fyrirtæki með himinhá verðmöt vegna fyrirheit um framtíðarvelgengni.
Ratcliffe er þekktur hér á landi fyrir jarðarkaup á Austurlandi en hann á til að mynda Grímsstaði á Fjöllum auk laxveiðijarða í Vopnafirði. Hann stofnaði fyrirtækið Ineos, sem sérhæfir sig í efnavinnslu, árið 1998. Velta fyrirtækisins nam 44,1 milljarði punda á síðasta ári og alls starfa 26 þúsund manns fyrir Ineos. Fyrirtækið keypti fyrir rúmu ári starfsemi breska olíurisans BP sem snýr að jarðolíu og -gasi.
Annar Íslandsvinur á listanum er Arik Shtilman, meðstofnandi og forstjóri fjártæknifyrirtækisins Rapyd, en hann situr í 87. sæti. Fyrirtækið keypti íslenska greiðslumiðlunarfyrirtækið Korta vorið 2020 og gekk nýlega frá kaupum á Valitor fyrir 12,3 milljarða króna, sem eru þó háð samþykki Samkeppniseftirlitsins. Í greininni segir að að Ísraelinn Shtilman hafi byggt upp fyrirtækið ITNavitgator upp frá grunni án fjárhagslegs stuðnings eða annarra fjárfesta. Þar segir að Rapyd sé metið á 6,3 milljarða punda eða um 1.123 milljarða króna
Richard Branson situr í öðru sæti en hann er auðvitað þekktastur fyrir Virgin veldið sitt. Vegferð Virgin Group hófst með hljómplötufyrirtækinu Virgin Records en samstæðan starfar í dag á breiðu sviði, svo sem í flugbransanum, hótelum ásamt því að fara með eignarhluti í bönkum.
Þá er Mike Ashley, eigandi Newcastle United fótboltaliðsins, í tíunda sætinu. Hann á íþróttavöruverslunarkeðja Sports Direct sem rekur m.a. verslun við Skógarlind 2. Ashley hefur vakið gagnrýni fyrir vinnuaðstæður í stóra vöruhúsi verslunarkeðjunnar í Derbyshrie og þykir umdeildur fyrir óhefðbundna stjórnunarhætti. Honum mislíkar „krimma“ orðsporið sitt og telur að hann fái ekki nægilega viðurkenningu fyrir að byggja upp fjögurra milljarða punda fataverslanaveldi ásamt björguninni á Hosue of Fraser árið 2018.
Malcolm Walker, stofnandi og stjórnarformaður Iceland matvöruverslunarinnar, er í ellefta sæti. Fyrirtækið opnaði verslanir hér á landi árið 2012 en í dag eru verslanir Iceland á Íslandi í eigu Samkaupa.
Efstu tíu frumkvöðlarnir á lista Financial Times:
- Jim Ratcliffe (Ineos)
- Richard Branson (Virgin Group)
- Mohsin Issa og Zuber Issa (EG Group)
- Andrew Owens (Greenergy)
- Simon Peckham (Melrose Industries)
- James Dyson (Dyson)
- Mike Norris (Computacenter)
- Simon Arora (B&M European Value)
- Stephen Fitzpatrick (Ovo Energy)
- Mike Ashley (Frasers Group)