Nasdaq OMX Iceland (Kauphöllin) hefur ákveðið að breyta sveifluvörðum fyrir viðskiptarofa (e. dynamic volatilty guards) tímabundið. Þröskuldurinn verður tvöfaldaður og mun það gilda fram á morgundaginn. Þetta kemur fram í tilkynningu frá Kauphöllinni.
Gripið er til þessara ráðstafana þar sem fyrirséð að nokkrar sveiflur verði á markaði í dag. Kerfið virkar almennt þannig að þegar verðbreyting verður ákveðið mikil þá stoppar kerfið í stutta stund, fer í uppboð og heldur síðan áfram. Með breytingunni er þröskuldurinn víkkaður til að hamla ekki eðlilegum viðskiptum. Með breytingunni fylgir Kauphöllin í fótspor annarra kauphalla á Norðurlöndunum.
Það sem af er degi er rautt um að litast á hlutabréfamarkaði. Úrvalsvísitalan hefur lækkað um rúm 3,6% í fyrstu viðskiptum. Svo nokkur dæmi séu tekin, þegar þetta er ritað, þá er Origo niður um 6,61% og Síminn, Eik, Festi, Sjóvá, Icelandair og VÍS hafa öll lækkað um á bilinu 5-6%. Hagar, Kvika, Reginn og Sýn hafa síðan lækkað um á bilinu 4-5%. Heimavellir, TM og Brim hafa staðið í stað og Eimskip er enn sem komið er eina félagið í grænu.
Í tilkynningu Kauphallarinnar segir að fylgst verði með stöðunni og mögulegt sé að sveifluverðinum verði breytt í eðlilegt horf strax í dag. Verði svo mun tilkynning um það verða send á markaðinn. Ef ekki er búist við því að hefðbundið ástand komist á á morgun.
Markaðir um veröld alla hafa tekið á sig skell í morgunsárið þegar viðskipti hófust á ný eftir helgarfrí. Ástæðan er Covid-19 veiran og áhrif vegna hennar. Stjórnvöld heimsins hafa gripið til víðtækra ráðstafana til að hefta útbreiðslu hennar og viðbúið að þær muni hafa áhrif á fyrirtæki heimsins.
