Hagnaður Regins eftir tekjuskatt jókst um 65% frá fyrra ári og nam hann rétt rúmum 2 milljörðum króna.
Rekstrartekjur Regins námu 3.222 milljónum króna á fyrstu sex mánuðum ársins. Nam vöxtur leigutekna frá fyrra ári 26% og voru þær 2.946 milljónir króna samanlagt.
Rekstrarhagnaður fyrir matsbreytingu og afskriftir (EBITDA) nam 2.126 milljónum króna, sem er aukning um 25% frá fyrra ári.
Bókfært virði eigna nærri 80 milljarðar
Matsbreyting eigna á tímabilinu nam 1.869 milljónum króna en bókfært virði fjárfestingareigna í lok þess nam 79 milljörðum króna.
Í lok tímabilsins nam fjöldi eigna þess 130 og heildarfermetrafjöldinn var um 319 þúsund. Er útleiguhlutfallið yfir 97,5% miðað við þær tekjur sem 100% útleiga gæfi. Eru stærstu eignir Regins verslunarmiðstöðin Smáralind og Egilshöllin.
H&M á leið í Smáralindina
Eru miklar breytingar fyrirhugaðar í Smáralind, til að mynda kemur verslunarkeðjan H&M inn í verslunarmiðstöðina og verslanasamsetningin mun breytast með endurskipulögðum rýmum.
Jafnframt mun félagið koma að frekari uppbyggingu sunnan Smáralindar á næstu árum.
Skuldir námu tæpum 48 milljörðum króna
Handbært fé frá rekstri nam 924 milljónum, en vaxtaberandi skuldir jukust úr 39.474 milljónum króna í árslok 2015 í 47.767 milljónir króna við lok tímabilsins.
Eiginfjárhlutfallið er 34% og hagnaður á hvern hlut í félaginu nam 1,34 en var 0,84 fyrir sama tímabil í fyrra, en fjöldi hluthafa þann 30. júní síðastliðinn voru 559. Félagið er skráð í Kauphöllina.