Í tilkynningu frá ráðuneytinu segir að ráðgjöfin sé gerð á grundvelli langtímamarkmiða um sjálfbæra nýtingu og er varúðarnálgun Alþjóðahafrannsóknaráðsins höfð að leiðarljósi. Reglugerðin fylgir alfarið ráðgjöf Hafrannsóknarstofnunar.
Í ráðgjöf Hafrannsóknastofnunar kemur fram að staða þorskstofnsins er sterk og því verða aflaheimildir í þorski auknar um 3%, úr 264.437 tonnum í 272.411 tonn. Aflamark í ýsu munu hins vegar dragast saman um 28% og skýrist það annars vegar af því að spá um um vöxt 2014 árgangsins gekk ekki eftir og jafnframt af breyttri aflareglu þar sem veiðihlutfall er lækkað úr 0.40 í 0.35. Aflamark ufsa verður aukið um 2% en veiðiheimildir fyrir gullkarfa, grálúðu og síld lækka.
Kristján Þór Júlíusson, sjávarútvegs- og landbúnaðarráðherra: „Það að byggja ákvörðun um leyfilegan heildarafla á grundvelli vísindalegrar ráðgjafar er ein af megin stoðum íslenskrar fiskveiðistjórnunar og tryggir sjálfbærni auðlinda hafsins til framtíðar. Árangur þeirrar stefnu er ótvíræður líkt og birtist meðal annars í því að hrygningarstofn þorsks hefur stækkað á undanförnum árum og hefur ekki verið stærri í tæp 60 ár. Hins vegar blasir við okkur í ráðgjöf Hafrannsóknastofnunar að það er nýliðunarbrestur í nokkrum tegundum en það er atriði sem þarf að bregðast við með frekari rannsóknum.“
Á vef ráðuneytisins má sjá ákvörðun um heildaraflamark fyrir einstakar tegundir. Tekið er fram að aflamark fyrir mikilvæga uppsjávarstofna verður ákveðið síðar á árinu.
Þar kemur fram að leyfilegur þorskafli verður 270 þúsund tonn og ufsinn 80 þúsund tonn.
