Reitir hafa fest kaup á fasteignafélaginu Vínlandsleið ehf. Öllum fyrirvörum vegna kaupanna hefur verið aflétt og var kaupsamningur undirritaður í dag. Yfirtaka félagsins mun fara fram 1. september 2018. Þetta kemur fram í tilkynningu Reita til Kauphallarinnar.
Reitir eiga þar með flest húsin við götuna Vínlandsleið í Grafarholti, það er númer 2-4, 6-8, 12-14 og númer 16, auk Norðlingabrautar 14.
Eins og Viðskiptablaðið greindi frá fyrr á þessu ári , höfðu samningar um kaupin náðst milli Reita og Vínlandsleiðar. Nú hafa kaupin því endanlega gengið í gegn.
Heildarvirði kaupanna er samtals 5.900 m.kr. Eignirnar eru í útleigu til 12 aðila með 100% útleiguhlutfall. 82% leigutekna eru við fimm opinbera aðila eða aðila sem eru á fjárlögum ríkisins en þeir eru: Sjúkratryggingar Íslands, Matís ohf., Lögreglustjórinn á höfuðborgarsvæðinu, Lyfjastofnun og Fjölmennt.
Um er að ræða rúmlega 18.000 leigufermetra af vönduðu húsnæði og er útleiguhlutfall 100%. Þessar fasteignir eru Vínlandsleið 2-4, 6-8, 12-14 og 16 auk Norðlingabrautar 14. Leigutekjur á ársgrunni nema um 440 m.kr. og er meðaltími leigusamninga um 13,5 ár. Leiða kaupin til þess að áætlaður rekstrarhagnaður (NOI) Reita hækkar um 350 m.kr. á ársgrundvelli.
