Fasteignafélagið Reitir hefur gengið endanlega frá sátt við Seðlabanka Íslands vegna meintra brota félagsins á lögum um gjaldeyrismál. Þessu greinir mbl.is frá.
Guðjón Auðunsson, forstjóri Reita, segist hafa skrifað undir nýja viðauka við erlenda lánasamninga félagsins um miðjan júnímánuð og nú sé loks mögulegt að skrá félagið á hlutabréfamarkað og auka hlutafé þess.
Í samtali við mbl.is segir Guðjón að félagið hafi áður samþykkt sáttina fyrir sitt leyti. Hins vegar gátu þeir ekki fullnustað hana nema með erlendum lánveitanda og það var þrautin þyngri. Nú séu þeir komnir með heimild Seðlabankans til að kaupa evrur til þess að greipa upp þessi tvö stóru lán í lok október næstkomandi sem eru samtals að andvirði um 85 milljónir evra.
Meint brot félagsins á lögum um gjaldeyrismál tengjast lánasamningum við þýska bankann Hyputhekenbank Frankfurt AG. Reitir samþykktu síðasta sumar sáttatillögu Seðlabankans vegna meintra gjaldeyrisbrota félagsins árið 2009 þegar gerðir voru viðaukar við níutíu milljóna evra lánasamning við þýska bankann. Þá var ekki óskað eftir undanþágu sem er nauðsynlegt samkvæmt lögum um gjaldeyrismal og voru viðaukarnir því ekki gildir að mati Seðlabankans.
Ekki var óskað eftir undanþágu, líkt og nauðsynlegt er samkvæmt lögum um gjaldeyrismál, og var það því mat Seðlabankans að viðaukarnir væru ekki gildir.
Eignasafn félagsins samanstendur af um 130 fasteignum sem nema 410 þúsund fermetrum að stærð og er því félagið eitt af stærstu fasteignafélögum landsins. Meðal eigna félagsins eru Kringlan, Hótel Hilton, Holtagarðar og Kauphallarhúsið og nam hagnaður félagsins tæpum 7,7 milljörðum króna í fyrra. Flestar eignir félagsins voru áður í eigu Landic Property en nú eru stærstu hluthafar þess Arion Banki, Landsbankinn og Íslandsbanki.
