Fasteignafélagið Reitir hefur endurmetið afkomuspá sína fyrir árið 2020 og lækkar hún um allt að 12,5%. Áætlað er að rekstrarhagnaður félagsins fyrir matsbreytingar verði 6.650-6.800 milljónir króna á þessu ári en áður hafði verið gert ráð fyrir 7.600-7.750 milljóna króna rekstrarhagnað. Frá þessu greinir félagið í tilkynningu.
Tekjuspá félagsins er sjö prósentustigum lægri en hún var áður. Reitir áætla að tekjur ársins verði 10.700-10.850 milljónir króna en áður hafði verið gert ráð fyrir 11.500-11.650 milljónum í árstekjur.
- Sjá einnig: Útboð Reitis samþykkt og Regins lokið
Fyrstu drög að rekstraráætlun fyrir árið 2021 gera ráð fyrir um 5% hækkun tekna frá fyrra ári og rekstrahagnaði fyrir matsbreytingu á bilinu 7.050-7.250 milljónir króna. Áætlað er að rekstrarafkoma þriðja ársfjórðungs verði á bilinu 1.560-1.590 milljónir króna og líklegt er að afkoma á fjórða ársfjórðungi verði sambærileg.
Stjórnendur áætla að heimsfaraldurinn hafi kostað félagið 291 milljón króna á þriðja ársfjórðungi samanborið við 315 milljónir á öðrum fjórðungi. „Lang stærstur hluti áætlaðra tapaðra tekna vegna Covid-19 hjá félaginu er vegna hótela og gististaða,“ kemur fram í tilkynningu félagsins. Nýtingarhlutfall fjórðungsins var rétt um 95% sem er betri nýting en á bæði fyrsta og öðrum ársfjórðungi.
