Rekstur Iceland Seafood hefur tekið við sér undanfarna mánuði en heimsfaraldurinn hefur haft veruleg áhrif á reksturinn. Hagnaður félagsins nam 5,6 milljónum evra fyrstu níu mánuði ársins miðað við 1 milljón evra á sama tíma fyrir ári.
Tekjur Iceland Seafood jukust um 16% á þriðja ársfjórðungi á milli ára og námu 111,3 milljónum evra. Söluvöxtur er jafn mikill fyrstu níu mánuði ársins eða 16% og nema tekjur félagsins á því tímabili 320 milljónum evra.
Í nýbirtu uppgjöri félagsins kemur fram að sala í Suður-Evrópu, einu af lykilmarkaðssvæðum félagsins, hafi tekið við sér frá marsmánuði, sér í lagi sala á léttsöltuðum þorski og rækju. Á Bretlandi hafi sameiningar hins vegar reynst flóknari og kostnaðarsamari en búist var við. Brexit og COVID-19 hafi haft margvísleg áhrif á reksturinn til að mynda í gegnum breskan vinnumarkaða og erfiðleika við flutninga.
Félagið gerir ráð fyrir að hagnaður af reglulegri starfsemi fyrir skatta nemi 12-16 milljónum evra á árinu 2021 en var til samanburðar 5 milljónir evra árið 2020 og 11 milljónir árið 2019. Hins vegar er sá fyrirvari gerður að heimsfaraldurinn hafi ekki óvænt neikvæð áhrif á reksturinn á síðustu tveimur mánuðum ársins sem eru mikilvægir í rekstrinum.
