Stjórn Orkuveitu Reykjavíkur samþykkti á fundi sínum í dag að styðja áfram við bakið á þátttöku Reykjavik Energy Invest í einkavæðingu filippseyska orkufyrirtækisins PNOC-EDC, sem nú stendur yfir, segir fréttatilkynningu.
Í tilkynningunni segir Bryndís Hlöðversdóttir, stjórnarformaður Orkuveitunnar, að með ákvörðuninni sé verið að standa vörð um hagsmuni almennings þar sem þegar hafi talsverðum fjármunum verið varið í verkefnið og verulegir hagsmunir séu í húfi. Þá þurfi að standa vörð um trúverðugleika REI.
Það eru REI og Geysir Green Energy sem standa saman að íslenskri þátttöku í tilraun til að eignast ráðandi hlut í filippseyska félaginu í bandalagi við heimamenn. Samstarf í þessu veru hófst haustið 2006 þegar Orkuveitan studdi tilboð Glitnis og FL-Group í fyrsta áfanga einkavæðingar PNOC-EDC, sem er stærsta jarðvarmaorkufyrirtæki Filippseyja.
Þar með hófst samstarf þessara aðila á Filippseyjum sem síðan var skjalfest með formlegum samningi GGE og OR í mars sl. um jarðhitaverkefni á Filippseyjum. Þetta samstarf hefur leitt til þátttöku í einkavæðingu síðustu 40% í sama félagi. Sá eignarhlutur sem nú er boðinn á markaði verður þó ráðandi í félaginu þar sem honum mun fylgja 60% atkvæðavægi í PNOC-EDC. Samstarfsaðili REI og Geysir Green Energy er First Gen, sem er stærsta orkufyrirtæki Filippseyja í einkaeigu.
