Stefnt er að opnun 800 fermetra rafíþróttavallar með góðri aðstöðu til æfinga, keppni og skemmtun í rafíþróttum við Hallveigarstíg 1 og mun völlurinn bera nafnið Heimavöllur. Þetta kemur fram í tilkynningu
Einnig mun fyrsti „Esports" bar landsins opna í hliðarsal, þar sem áhugafólk um rafíþróttir geta komið saman á einum stað til að fylgjast með stærstu mótunum hér heima og erlendis.
Að stofnun félagsins koma reynsluboltar úr atvinnulífinu, en stjórnarformaður félagsins er Guðjón Már Guðjónsson, eigandi og framkvæmdastjóri tæknifyrirtækisins OZ. Ásamt Guðjóni skipa stjórnina Melína Kolka Guðmundsdóttir varaformaður Rafíþróttasamtaka Íslands og stofnandi Tölvuleikjasambands íslenska kvenna, Gestur Pétursson forstjóri Veitna, Jóhannes Þór Skúlason framkvæmdastjóri Samtaka ferðaþjónustunnar og Tryggvi Freyr Elínarson eigandi og þróunarstjóri Datera.
Framkvæmdastjóri Heimavallar er Gunnar Þór Sigurjónsson en hann er fyrrum upplýsingaöryggisstjóri hjá Samkeppniseftirlitinu ásamt því að vera rafíþróttaspilari til fjölda ára og virkur í fjölbreyttu félags- og ungmennastarfi.
„Það er mikill heiður að vera hluti af svona sterku teymi sem ætlar að því að koma rafíþróttum á Íslandi upp á næsta stig. Atvinnulífið hér heima er byrjað að sjá tækifærin í þessum risastóra og sístækkandi markaði, enda flest stærstu vörumerki heims að tengja sig við rafíþróttir.
Þess vegna skiptir okkur miklu máli að gera hlutina vel og í þéttu samstarfi við Rafíþróttasamtök Íslands og rafíþróttadeildir íþróttafélaganna. Markmið okkar er að vera hluti af og vinna með rafíþróttasamfélaginu á Íslandi að þessari spennandi þróun,“ segir Gunnar Þór í tilkynningunni.