Milljarðamæringurinn Michele Ferrero er er látinn, 89 ára að aldri, en súkkulaðiveldi hans gerði Ferrero að ríkasta manni Ítalíu. Fyrirtæki hans framleiðir vel þekkt vörumerki eins og súkkulaðiviðbitið Nutella, Ferrero Rocher súkkulaðimolana og Kinder egg.
Samkvæmt frétt BBC lést Ferrero í gær en hann hafði glímt við veikindi undanfarna mánuði.
Grunnurinn að viðskiptaveldinu var lagður þegar faðir Michele, Pietro Ferrero, þróaði forvera Nutella með því að blanda saman smávegis magni af kakói og miklu magni af heslihnetum og fékk blandan nafnið Giandujot. Með þessu móti gat fólk keypt vöru með súkkulaði á viðráðanlegu verði, en á þessum tíma var súkkulaði mjög dýrt.
Michele breytti uppskriftinni og árið 1964 komu fyrstu glösin af Nutella á markað. Alls vinna ríflega 22.000 manns hjá fyrirtækinu og nemur velta fyrirtækisins um átta milljörðum evra á ári, andvirði um 1.200 milljörðum króna.
