Ríkissjóður hefur gert samkomulag við eigendur Auðkennis ehf., útgefanda rafrænna persónuskilríkja, um kaup ríkisins á öllu hlutafé Auðkennis fyrir um 948 milljónir króna. Þetta kemur fram í tilkynningu frá Fjármála- og efnahagsráðuneytinu .
Kaupverðið nemur bókfærðu hlutafé félagsins sem er um 80% af því fjármagni sem eigendur félagsins hafa lagt til félagsins í formi hlutafjár til þess að þróa lausnina. Landsbankinn, Íslandsbanki og Arion banki voru stærstu eigendur félagsins með um fjórðungshlut hver fyrir sig og Síminn átti 16%.
„Samhliða samkomulagi um kaupin var undirrituð yfirlýsing um fyrirkomulag rekstrar og framþróunar lausnar félagsins í samstarfi við stærstu þjónustuveitendur, sem í dag eru auk ríkis og sveitarfélaga aðallega viðskiptabankarnir þrír," segir í tilkynningunni.
„Aðilar samkomulagsins eru sammála um að kaup ríkisins á Auðkenni séu í samræmi við þá miklu þróun rafrænnar auðkenningar sem orðið hefur í samfélaginu og mun áfram aukast, ekki síst samhliða aukinni, bættri og aðgengilegri stafrænni opinberri þjónustu. Ríkið gefur út almenn skilríki, s.s. ökuskírteini og vegabréf og nú einnig rafræn skilríki.
Meginverkefni Auðkennis verður að tryggja áframhaldandi þróun og útbreiðslu rafrænna skilríkja meðal almennings, sem einnig styður við þróun tengdrar stafrænnar þjónustu innan hins opinbera geira og einkageirans og sjálfbæra þróun félagsins."
Auðkenni er útgefandi rafrænna skilríkja sem jafngilda persónuskilríkjum. Hægt er að nota þau til fullgildrar undirritunar sem jafngildir eigin undirritun. Velta félagsins jókst um 35,2% í faraldrinum á síðasta ári og var hagnaður þess um 88,8 milljónir króna.