*

mánudagur, 30. mars 2020
Innlent 24. mars 2020 17:42

Ríkisbankarnir loka útibúum

Íslandsbanki og Landsbanki loka útibúum sínum. Landsbankinn opinn ef brýn nauðsyn krefur til. Arion takmarkar opnunartíma.

Ritstjórn
Lilja Björk Einarsdóttir er bankastjóri Landsbankans, Birna Einarsdóttir er bankastjóri Íslandsbanka og Benedikt Gíslason er bankastjóri Arion banka, en allir þrír viðskiptabankarnir hafa brugðist við útbreiðslu kórónuveirunnar.
vb.is

Útibúum beggja viðskiptabankanna sem eru í eigu ríkisins, Íslandsbanka og Landsbankans, hefur verið lokað, nema í tilfellum sem brýn nauðsyn krefur til, vegna útbreiðslu kórónuveirunnar Covid 19, meðan á hertu samkomubanni stjórnvalda gildir.

Þriðji viðskiptabankinn, Arion banki, hefur hins vegar takmarkað opnunartíma margra sinna útibúa eða lokað í sumum tilfellum ásamt því að biðja um að viðskiptavinir takmarki heimsóknir í útibú eins og kostur er.

Allir þrír bankarnir benda jafnframt á stafrænar lausnir, til að mynda að hægt sé að framkvæma flestar almennar bankaaðgerðir í netbönkum og smáforritum eða öppum bankanna. Íslandsbanki bendir á að viðskiptavinir geta bókað tíma í símaráðgjöf á vef Íslandsbanka þegar þeim henti, sem og netspjall, auk þess að hafa samband við þjónustusímann.

Hér má sjá yfirlit yfir valkosti í samskiptum við Íslandsbanka:

 

Landsbankinn býður upp á svipaða þjónustu en einnig býður bankinn upp á afgreiðslu í útibú ef erindið er mjög brýnt en þá þurfi að panta tíma fyrirfram, með því að hafa samband við þjónustuver bankans í síma 410-4000, í gegnum netspjall bankans, eða í gegnum tölvupóstfangið landsbankinn@landsbankinn.is.

Hjá Landsbankanum gilda lokanirnar einnig hjá Fyrirtækjamiðstöð bankans og afgreiðslu Bíla- og tækjafjármögnunar hans í Borgartúni, en upplýsingar um þjónustu við fyrirtæki má finna á vef bankans.

Lilja Björk Einarsdóttir, bankastjóri Landsbankans, segir að með því að takmarka afgreiðslu í útibúum tímabundið sé verið að draga úr hættu á útbreiðslu Covid-19 og stuðla að bættu öryggi viðskiptavina og starfsfólks.

„Um leið fær starfsfólk mikilvægt svigrúm til að sinna óskum viðskiptavina um upplýsingar, úrræði og aðstoð. Við leggjum mikla áherslu á að styðja við viðskiptavini okkar um allt land á meðan þetta ástand varir. Í langflestum tilfellum má ljúka erindum með rafrænum hætti, með símtali eða tölvupósti. Við munum leysa úr málunum saman,“ segir Lilja Björk.

Hér má sjá yfirlit yfir opnunartíma útibúa Arion banka:

Vesturland

  • Borgarnes: Frá klukkan 12:00 til 15:00
  • Stykkishólmur: Frá klukkan 12:00 til 15:00
  • Búðardalur: Frá klukkan 12:00 til 14:00

Norður- og Austurland

  • Akureyri: Frá klukkan 11:00 til 16:00
  • Blönduós: Frá klukkan 10:00 til 12:00
  • Egilsstaðir: Frá klukkan 12:00 til 15:00
  • Fjallabyggð: Frá klukkan 12:00 til 15:00
  • Sauðárkrókur: Frá klukkan 12:00 til 15:00

Suðurland

  • Selfoss: Frá klukkan 9:00 til 12:00 og 13:00 til 16:00
  • Hella: Frá klukkan 9:00 til 12:00 og 13:00 til 16:00
  • Vík: Frá klukkan 12:30 til 15:00
  • Klaustur: Þriðjudaga og miðvikudaga frá klukkan 12:30 til 15:00
  • Hveragerði: Lokað

Höfuðborgarsvæðið

  • Hefðbundinn opnunartími á Bíldshöfða og á Smáratorgi.
  • Við Hagatorg er fjarfundarbúnaður lokaður. Gestgjafi aðstoðar með sjálfsafgreiðsluvélar á staðnum.
  • Lokað í Borgartúni 18 og í Kringlunni en sjálfsafgreiðsluvélar eru aðgengilegar.