Ríkisendurskoðun hefur sent frá sér leiðbeiningar er varðar breytingu ríkisaðila í hlutfélag. Með leiðbeiningunum sem nefnast "Breyting ríkisaðila í hlutafélag. Lagaákvæði og reikningsskilareglur við gerð sérfræðiskýrslu skv. 6. gr. hlutafélagalaga" vill Ríkisendurskoðun leggja sitt af mörkum við að tryggja að mat á eignum og skuldum ríkisaðila, sem breytt er í hlutafélög og Ríkisendurskoðun er falið að gera sérfræðiskýrslu um, sé unnið með skipulegum og samræmdum hætti.
Leiðbeiningar þessar taka einkum til breytingar ríkisaðila í hlutafélag sem ætlunin er að verði áfram í eigu ríkisins. Þær taka hins vegar ekki til þess hvernig standa skuli að undirbúningi að sölu slíkra fyrirtækja til einkaaðila.
Í leiðbeiningunum er greint frá lagareglum sem gilda um stofnun hlutafélaga sem og reikningshaldslegum atriðum sem reynir á við mat eigna og skulda.
