Ríkissjóður fjármagnar eiginfjárframlag bankanna ? þó litlar líkur á að skuldabréfin fari á markað

Seðlabankinn tilkynnti í gær um útgáfu á nýjum flokki ríkisskuldabréfa en flokkurinn hefur þann tilgang að fjármagna eiginfjárframlag ríkissjóðs til hinna nýju viðskiptabanka sem reistir voru á grunni bankanna þriggja sem féllu í fyrrahaust.

Í Morgunkorni Íslandsbanka kemur fram að áætlað er að eigið fé Íslandsbanka verði 65 milljarðar króna og eigið fé Nýja Kaupþings verði 72 milljarðar króna, en ekki liggi enn fyrir hversu hátt eiginfjárframlag til Nýja Landsbankans muni verða.

Upphafleg stærð flokksins verður því í samræmi við eiginfjárþörf fyrrnefndu bankanna tveggja, þ.e. 137 milljarðar króna.

Greining Íslandsbanka segir þó að hins vegar séu töluverðar líkur á því að Glitnir og (gamla) Kaupþing kaupi meginhluta hlutafjár ríkisins í þessum bönkum á næstu mánuðum, og þeir komist þar með óbeint í meirihlutaeigu kröfuhafa gömlu bankanna tveggja. Verði af því mun samsvarandi hluta skuldabréfanna nýju verða skilað til baka til ríkisins.

Fram kemur að flokkurinn nýi ber fljótandi vexti sem taka mið af innlánsvöxtum hjá Seðlabanka Íslands. Lokagjalddagi hans er 9.október 2018. Verður hann skráður í Kauphöllinni en um viðskiptavakt verður ekki að ræða.

Litlar líkur á að bréfin fari á markað á næstunni

„Við teljum mestar líkur á því að þessi bréf rati ekki á markað næsta kastið,“ segir í Morgunkorni.

„Fyrir það fyrsta eru talsverðar líkur eru á að þeim hluta skuldabréfanna sem snúa að fjármögnun Íslandsbanka og Nýja Kaupþings verði skilað að langmestu leyti, og flokkurinn verði því miklum mun smærri en þeir 300 ma.kr. sem heimilt er að gefa út í honum. Þá hafa viðskiptabankarnir yfir að ráða gnægð lausafjár.“

Þá segir Greining Íslandsbanka að líklega liggi það beint við fyrir þá banka að halda sjálfir þeim bréfum sem í skaut þeirra falla og hafa af þeim sömu vexti og bankarnir fá af innlánum hjá Seðlabankanum.

„Ekki er þó loku fyrir það skotið að einhver hluti bréfanna verði seldur ef sneiðist mjög um lausafé í fjármálakerfinu þegar frá líður. Næsta kastið hentar þetta form fjármögnunar bankanna hins vegar ríkissjóði vel, þar sem hann á umtalsverðar fjárhæðir á innlánsreikningi sínum í Seðlabanka og munu vaxtatekjur af því fé og vaxtagjöld vegna hinnar nýju skuldabréfaútgáfu því standast á að talsverðu leyti,“ segir í Morgunkorni.