*

laugardagur, 28. nóvember 2020
Innlent 20. nóvember 2020 13:11

Ríkisstjórnin kynnir frekari aðgerðir

Katrín Jakobs, Bjarni Ben, Sigurður Ingi og Ásmundur Einar boða til kynningarfundar á framhaldi viðskpyrnuaðgerða.

Ritstjórn
Auk ráðherranna og forystumanna ríkisstjórnarinnar, þeim Bjarna Benediktssonar, Katrínar Jakobsdóttur og Sigurðar Inga Jóhannssonar verður einnig Ásmundur Einar Daðason félags- og barnamálaráðherra á fundinum á eftir.
Haraldur Guðjónsson

Ríkisstjórn Vinstri grænna, Sjálfstæðisflokks og Framsóknarflokks boðar til kynningarfundar í dag um framhald viðspyrnuaðgerða vegna áhrifa kórónuveirufaraldursins á íslenskt efnahagslíf.

Á fundinum, sem haldinn verður klukkan 15:00 í dag, föstudaginn 20. nóvember, í Hörpu verða þau Katrín Jakobsdóttir, forsætisráðherra, Bjarni Benediktsson, fjármála- og efnahagsráðherra, Sigurður Ingi Jóhannsson, samgöngu- og sveitarstjórnarráðherra og Ásmundur Einar Daðason, félags- og barnamálaráðherra.

Eins og Viðskiptablaðið sagði frá í lok október boðaði ríkisstjórnin framhald efnahagsaðgerða vegna kórónuveirufaraldursins fram á mitt næsta ár, þar á meðal framlengingu hlutabótaleiðarinnar og framhald lokunarstyrkja.

Einnig var þá gert ráð fyrir útvíkkun tekjufallsstyrkja til fyrirtækja sem yrðu hækkaðir í 17,5 milljónir króna að hámarki, auk nýrra viðspyrnustyrkja sem taki við af þeim til að styðja við lágmarksstarfsemi á meðan áhrifa faraldursins gætir.