Í morgun fór sendinefnd níu Íslendinga til Noregs til að taka þátt í aðalfundi NEI TIL EU í Noregi, en það eru systursamtök HEIMSSÝNAR á Íslandi.
Þetta kemur fram í tilkynningu frá Heimssýn en í sendinefndinni eru m.a. þrír þingmenn frá jafn mörgum flokkum.
Þá kemur fram að heimsókn Íslendinganna hefur vakið mikla fjölmiðlaathygli í Noregi og Ásmundur Einar Daðason, nýkjörinn formaður Heimssýnar m.a. verið í sjónvarps- og útvarpsviðtölum hjá NRK og víðar. Ísland sé eitt meginþema aðalfundarins, sem haldinn er á Gardemoen, að þessu sinni og halda íslensku fulltrúarnir nokkrar ræður og taka þátt í málstofum um Ísland.
Á mánudag munu fulltrúar Heimssýnar funda með NEI TIL EU á skrifstofu samtakanna í Osló og með systurflokkum Framsóknarflokks, Sjálfstæðisflokks og Vinstri grænna.
Í sendinefndinni eru:
- Ásmundur Einar Daðason alþingismaður
- Vigdís Hausdóttir alþingismaður
- Unnur Brá Konráðsdóttir alþingismaður
- Kolbrún Halldórsdóttir fv. umhverfisráðherra
- Reynir Jóhannesson starfsmaður Heimssýnar og félagi í SUS
- Páll Vilhjálmsson blaðamaður
- Ragnar Friðrik Ólafsson sálfræðingur
- Guðjón Ebbi Guðjónsson frá ungum Framsóknarmönnum
- Brynja Björg Halldórsdóttir fv. formaður Ungra vinstri grænna