*

miðvikudagur, 28. október 2020
Innlent 21. september 2020 09:06

Risabreytingar í upplýsingatækni 2021

Viðskiptastjóri Origo segir fjórar stórar breytingar í farvatninu, í netöryggi, viðbættum veruleika, gervigreind og jaðarvinnslu.

Ritstjórn
Snæbjörn Ingi Ingólfsson viðskiptastjóri Origo
Aðsend mynd

Snæbjörn Ingi Ingólfsson, viðskiptastjóri Origo, segir fjórar stórar breytingar í upplýsingatækni handan við hornið, á sviðum þar sem tækniþróun hefur verið ör á undanförnum árum og gera megi ráð fyrir að svo verði áfram raunin.

Segir hann tæknina vera orðinn fastann liður í tilverunni og sé bæði fólki og fyrirtækjum nauðsynleg sem aldrei fyrr. Sama hvar það búi í heiminum verði fólk óhjákvæmilega og áþreifanlega vart við hvernig tæknin umbreyti daglegu lífi fólks.

173 milljarða dala markaður

„Eftir því sem tækninni fleygir fram og bæði fólk og fyrirtæki nýtir tæknilausnir í auknum mæli verður öryggi á netinu sífellt mikilvægara. Og vegna yfirstandandi heimsfaraldurs er netöryggi orðið enn mikilvægari þáttur í forgangsröðun hvers fyrirtækis. Hið nýja heimsástand hefur valdið gríðarlegri aukningu í því að fólk vinni að heiman, og því er orðið meira krefjandi en áður að tryggja öryggi starfsfólks og tækja þeirra, ásamt viðkvæmum upplýsingum fyrirtækja,“ segir Snæbjörn.

„Tækni á sviði netöryggis er í stöðugri þróun til að unnt sé að verjast tölvuþrjótum, sem beita sífellt snjallari og háþróaðri aðferðum við að fremja tölvuglæpi. Samkvæmt nýjustu upplýsingum nam velta á markaði með netöryggi 173 milljörðum dala á heimsvísu á árinu 2020 og er búist við að sú tala verði orðin 270 milljarðar dala árið 2026. Störfum á sviði netöryggis fjölgar þrefalt hraðar en störfum í nokkurri annarri tæknigrein, sem endurspeglar vaxandi eftirspurn."

Snæbjörn segir annað atriði vera viðbættan veruleika (e. Virtual Reality) sem margir hafi prófað, án þess endilega að skilja til fulls hvað í honum felist.

„En skilningur á viðbættum veruleika er að aukast eftir því sem fleiri fyrirtæki nýta hann í rekstri sínum. Viðbættur veruleiki er nú þegar mikið notaður í tölvuleikjaiðnaðinum, þar sem hann nýtur síaukinna vinsælda. Fyrirtæki geta nýtt sér kosti viðbætts veruleika með margvíslegum hætti,“ segir Snæbjörn.

„Þau geta til dæmis boðið sjónrænar lausnir sem gera neytendum kleift að ímynda sér hvernig það væri að eiga vöru eða upplifa þjónustu áður en hún er keypt. Og eftir því sem heimurinn lagar sig að hinum nýju takmörkunum sem fylgja heimsfaraldrinum gæti viðbættur veruleiki leikið stærra hlutverk í daglegum samskiptum."

Ótrúlegur vöxtur í gervigreind á næsta ári

Snæbjörn bendir á að gervigreind njóti nú þegar mikilla vinsælda og sé mikið notuð. Gera megiráð fyrir að hún verði sívaxandi þáttur á mörgum ólíkum sviðum daglegs lífs.

„Sérfræðingar spá gríðarmikilli aukningu í notkun gervigreindar á árinu 2021 og að hún verði nýtt í nær allri tækniþjónustu og -vörum. Gervigreind hentar sérlega vel til að spá fyrir um og meta áhættur og viðhald og er nú þegar víða nýtt í þeim tilgangi,“ segir Snæbjörn.

„Búast má við að gervigreind muni umbylta því hvernig við lifum og störfum ásamt því að skapa gríðarmikil verðmæti og auka framleiðni. Greiningarfyrirtækið Gartner spáir því að gervigreind muni auka verðmætasköpun um sem nemur 2,9 billjónum dala og framleiðni vinnuafls um 6,2 milljarða klukkustunda á heimsvísu, sem gefur vísbendingu um hin gríðarmiklu áhrif sem þessi tækni kemur til með að hafa.“

Jaðarvinnsla er næsta stóra skrefið

Snægbjörn segir að skýjavinnsla og skýið séu ekki lengur aðeins upprennandi og efnileg tækni heldur ómissandi þáttur í daglegu lífi, og jaðarvinnsla (e. edge computing) sé næsta stóra skrefið fram á við.

„Jaðarvinnsla er tækni sem var þróuð í fjarskipta- og farsímageiranum og breiðist nú hratt út til nær allra atvinnugreina. Hugsunin að baki jaðarvinnslu er að færa gagnavinnslu eins nálægt uppruna gagnanna og mögulegt er. Jaðarvinnsla nýtir skýið en er þó verulega þróaðri tækni og er leið til að eyða biðtímanum sem fylgir skýjavinnslu.“