*

fimmtudagur, 4. júní 2020
Fólk 20. mars 2020 12:34

Róbert Marshall talar fyrir stjórnina

Fyrrum alþingismaður, fréttamaður, formaður Blaðamannafélagsins og síðast fjallaleiðsögumaður nýr talsmaður ríkisstjórnarinnar.

Ritstjórn
Róbert Marshall verður talsmaður ríkisstjórnarinnar næstu þrjá mánuði.
Aðsend mynd

Róbert Marshall hefur verið ráðinn til þriggja mánaða í stöðu upplýsingafulltrúa ríkisstjórnarinnar, en verður verður með aðsetur í forsætisráðuneytinu og hefur störf 1. apríl næstkomandi.

Róbert er fyrrverandi alþingismaður fyrir Samfylkinguna á árunum 2009 til 2013, en hefur starfað við fjallaleiðsögn, þjálfun og útivist undanfarin ár. Hann starfaði við fjölmiðla um árabil og var aðstoðarmaður samgönguráðherra áður en hann settist á þing árið 2009. Róbert er fyrrverandi formaður Blaðamannafélags Íslands og var um tíma forstöðumaður fréttasviðs 365.

Hann stundaði fiskvinnslu, netagerð og sjómennsku í Vestmannaeyjum og er stúdent frá framhaldsskólanum þar. Á þingi gegndi hann m.a. þingflokksformennsku, formennsku í allsherjarnefnd, formennsku í Íslandsdeild þings Öryggis- og samvinnustofnunar Evrópu og sat í umhverfis- og samgöngunefnd, Þingvallanefnd og Norðurlandaráði.