Besti knattspyrnumaður heims Cristiano Ronaldo hefur verið ákærður af spænsku yfirvöldum fyrir 14,8 milljón evra skattsvik.

Ronaldo er tekjuhæsti íþróttamaður heims með um 93 milljónir dollara í árstekjur .

Snýr ákæran að því að Ronaldo taldi ekki fram allar tekjur sínar vegna ímyndarréttar á árunum 2011 til 2014. Gaf hann upp tekjur upp á 11,5 milljónir evra meðan heildarupphæðin nam 43 milljónum yfir tímabilið.

Samkvæmt ákærunni fóru skattsvikin þannig fram að sett var upp fyrirtæki á Bresku Jómfrúareyjunum sem átti að sjá um ímyndarrétt Portúgalans. Það fyrirtæki færði svo réttinn yfir í annað fyrirtæki sem var skráð á Írlandi. Í tilkynningu frá saksóknara í málinu segir að fyrirtækið á Bresku Jómfrúareyjunum hafi verið sett á laggirnar með þeim tilgangi að villa um fyrir spænskum skattayfirvöldum.

Málið er keimlíkt máli Lionel Messi sem var á dögunum sakfelldur fyrir að hafa komið tekjum af ímyndarrétti undan skatti með hjálp aflandsfélaga.