Rósa Kristinsdóttir hefur verið ráðin til Akta sjóða og mun starfa sem lögfræðingur og regluvörður félagsins. Hún hefur undanfarin ár starfað sem framkvæmdastjóri Framtíðarinnar lánasjóðs, sem sérfræðingur á bankasviði Kviku banka og fulltrúi hjá LOGOS lögmannsþjónustu. Rósa hefur lokið meistaraprófi í lögfræði frá Háskólanum í Reykjavík, en hún lagði auk þess stund á laganám við Bucerius háskóla í Hamborg.
Akta sjóðir er ört stækkandi sjóðstýringarfyrirtæki sem annast rekstur og stýringu verðbréfa-, fjárfestingar- og fagfjárfestasjóða fyrir hönd viðskiptavina sinna. Í starfi sínu hjá Akta mun Rósa hafa yfirumsjón með lögfræðilegum málefnum, sinna regluvörslu og styðja við frekari vöxt félagsins.
