Mikið hefur verið fjallað um svokallaðar „falskar fréttir“ að undanförnu, fréttir sem komið er á kreik beinlínis til þess að halla réttu máli, valda ruglingi og sá efasemdum um hið rétta.
Könnun bandarísku rannsóknarstofnunarinnar Pew bendir til þess að þar í landi hafi allur þorri fólks, um 90% svarenda, áhyggjur af þessari þróun og telji þær valda ruglingi hjá almenningi um mikilvæg málefni líðandi stundar.
Finna má ýmsan mun á afstöðu þjóðfélagshópa, en ekki verulegan. Konur hafa meiri áhyggjur en karlar af því að fólk ruglist í ríminu, ungt frekar en eldra, demókratar frekar en repúblikanar. Mestur er munurinn þó eftir tekjum, en áhyggjurnar aukast í réttu hlutfalli við tekjurnar.
