Rúmlega 200 störf skapast með því að treysta stoðir nýsköpunar, meðal annars með samkomulagi ríkisstjórnarinnar um aðkomu atvinnuleysistryggingasjóðs segir í tilkynningu.

Það felur í sér að sjóðurinn greiði 90% af bótum hvers manns sem fyrirtæki ræður af atvinnuleysisskrá leggi fyrirtækið það sama á móti. Ekkert takmark er á fjölda starfsmanna. Nú þegar hafa um 50 hátækni- og sprotafyrirtæki gert tilboð um 230 nýjar stöður.

Össur Skarphéðinsson iðnaðarráðherra sagði frá samkomulagi ríkisstjórnarinnar á rúmlega þúsund manna fjöldafundi hátækni- og nýsköpunarfyrirtækja síðastliðinn föstudag. Undirtektir fundarmanna við skilaboðunum voru mjög góðar og sagði ráðherra að von væri á fleiri jákvæðum skilaboðum.

„Undirtektirnar eru gífurlega góðar og það er full ástæða til að hvetja sem flest fyrirtæki til að nýta sér þessa heimild,“ segir Davíð Lúðvíksson forstöðumaður nýsköpunar hjá Samtökum iðnaðarins. Hann segir fyrirtækin sjálf hafa sýnt málinu mikinn áhuga og þau bíði nú nánari útfærslu á fyrirkomulaginu frá stjórnvöldum; „Fyrirspurnum hefur engu að síður rignt inn til þessara fyrirtækja og mörg þeirra eru tilbúin að hefja ráðningarferlið strax.“