Samtök atvinnulífsins fagna 50 punkta stýrivaxtalækkun Seðlabankans, að því er fram kemur í gein á vefsíðu samtakanna. Þar segir að þó ákvörðunin hafi komið flestum markaðsaðilum á óvart þá sé hún í senn vel skiljanleg og rökrétt.
„Síðastliðin tvö ár hefur ríkt fádæma verðstöðugleiki hér á landi og gangi verðbólguspár eftir mun verðbólgan fara niður fyrir neðri vikmörk verðbólgumarkmiðs Seðlabankans. Verði það raunin þarf bankinn að senda bréf til stjórnvalda og gera grein fyrir því hvernig hann ætlar að auka verðbólgu fremur en að hemja hana svo að hún nálgist markmiðið á ný. Þrátt fyrir þessa fátíðu stöðu eru raunstýrivextir enn háir og breytist raunaðhald peningastefnunnar lítið fyrst um sinn, gangi verðbólguspár greiningaraðila eftir í ágúst. Áfram verða því raunvstýrivextir háir og umtalsvert hærri en gengur og gerist í nágrannalöndum.“
Í greininni segir að verðbólga sé í dag rétt ríflega eitt prósent og gangi spár eftir muni ársverðbólgan ganga enn frekar niður. Seðlabankinn sé því kominn í þá undarlegu stöðu að glíma við of lága verðbólgu með raunstýrivexti í kringum 5%. Vaxtalækkunin í gær sé þó til merkis um að Seðlabankinn sé tilbúinn að lækka vexti á slíkum tímum þrátt fyrir vaxandi innlenda þenslu.
„Hvert verður haldið héðan? Þegar hrávöruverð tók að lækka á seinni hluta ársins 2014 var vandséð hvort sú kjarabót yrði langvinn og var ábyrg sú afstaða peningastefnunefndar að líta framhjá sveiflum á hrávörumörkuðum við vaxtaákvarðanir sínar. Nú tveimur árum síðar er fátt sem bendir til þess að verð á þessum vörum nái aftur fyrri hæðum í bráð og eins eru vísbendingar þess efnis að krónan muni halda áfram að styrkjast á komandi misserum og jafnvel við afléttingu hafta. Vaknar þá sú spurning hvort að það viðbótarsvigrúm sem siglt hefur þjóðinni áfallalaust í gegnum sögulega miklar launahækkanir sé ekki komið til að vera hið minnsta um nokkra hríð? Þó ekkert sé gefið um þróun ytri skilyrða og fátt sé eins fallvalt og heppni þá vaknar sú áleitna spurning hvort ekki sé réttast að létta undir með fyrirtækjum og almenningi og lækka vexti enn frekar líkt og svigrúm virðist fyrir á komandi misserum.“
