*

mánudagur, 26. júlí 2021
Innlent 17. mars 2015 14:06

SA leggja til nýjar leiðir í kjarasamningum

Samtök atvinnulífsins hafa óskað eftir samstarfi um að stokka upp áratugagömul launakerfi.

Ritstjórn
Þorsteinn Víglundsson er framkvæmdastjóri Samtaka atvinnulífsins.
Haraldur Guðjónsson

„Kjaraviðræður eru í alvarlegum hnút. Verkalýðshreyfingin kemur til kjaraviðræðna með kröfur um tugprósenta launahækkanir í skammtímasamningi. Næðu slíkar kröfur fram að ganga myndi verðbólgan fara á flug á nýjan leik. Leita verður allra leiða til að forða því.“

Þetta segir í umfjöllun á vefsíðu Samtaka atvinnulífsins (SA), þar sem fram kemur að nálgast verði kjaraviðræður með allt öðrum hætti ef ekki eigi illa að fara. Launakerfin séu vel komin til ára sinna.

„Tiltölulega lág grunnlaun í samanburði við heildarlaun, háar álagsgreiðslur og mikill ósveigjanleiki í skipulagi vinnutíma svara illa þörfum atvinnulífsins. Vaxandi greinar á borð við ferðaþjónustu kalla á mun meiri sveigjanleika. Sama gildir um aðrar lykilatvinnugreinar á borð við iðnað og sjávarútveg, svo ekki sé minnst á nýsköpunarfyrirtæki,“ segir í umfjölluninni.

Hærri grunnlaun og minni yfirvinna

Samtökin leggja til að grunnlaun verði hækkuð en jafnframt verði samningsbundnar álagsgreiðslur á laun hækkaðar. 

„Álagsgreiðslur á Íslandi, á borð við greiðslur fyrir yfirvinnu og vaktavinnu, eru mun hærri hér en í nágrannalöndunum. Hátt hlutfall yfirvinnugreiðslna er kerfislægur þáttur í launakerfum á Íslandi sem að töluverðu leyti má rekja til reglna í kjarasamningum.“

Þá segja samtökin að uppstokkun launakerfa gæti orðið farvegur til að koma til móts við kröfur um betri framfærslumöguleika dagvinnulauna og styttri vinnutíma án þess að raska verðstöðugleika. 

„Slík uppstokkun krefst mikillar vinnu og gaumgæfa þarf möguleg áhrif slíkra breytinga á starfsumhverfi og samkeppnishæfni fyrirtækja í bráð og lengd. Fyrirtækin þurfa tíma til aðlögunar að breytingunum en þegar fram í sækir væri markmiðið að ný launakerfi væru ráðandi í atvinnulífinu.“

Lesa má nánar um tillögurnar á vefsíðu samtakanna.