Vilhjálmur Egilsson, framkvæmdastjóri Samtaka atvinnulífsins (SA), segir stefnumörkun stjórnvalda um aðgerðir til að bæta rekstrarumhverfi fyrirtækja mjög mikilvæga og skref í rétta átt.
Þetta kemur fram á vef SA.
Samkvæmt stefnumörkun stjórnvalda verði réttar ákvarðanir teknar varðandi starfsumhverfi íslenskra fyrirtækja en vinna þurfi frekar að þeim.
Vilhjálmur segir mjög ánægjulegt að ríkisstjórnin lýsi yfir vilja til að hverfa frá gjaldeyrishöftum og að semja eigi við erlenda lánadrottna til að koma bankaviðskiptum í eðlilegt horf. Aðrar aðgerðir sem kynntar voru í morgun séu einnig mikilvægar sem vinna þurfi að.
