*

sunnudagur, 28. febrúar 2021
Fólk 6. janúar 2021 12:42

Særúnu sagt upp störfum hjá Högum

Hagar hafa lagt niður stöðu samskiptastjóra sem Særún Ósk Pálmadóttir gegndi áður.

Ritstjórn
Særún Ósk Pálmadóttir.
Lárus Karl Ingason

Særúnu Ósk Pálmadóttur, samskiptastjóra Haga, var sl. mánudag sagt upp störfum hjá fyrirtækinu um leið og staða hennar var lögð niður. Hún segir frá þessu í færslu á samfélagsmiðlinum Twitter. Þar með er Særún sú fyrsta en jafnframt sú síðasta til að gegna umræddri stöðu hjá Högum.

Í færslunni segir Særún að á meðan allir séu að fá nýja vinnu þessa dagana, sé hennar starf lagt niður. „Fyrsti og síðasti samskiptastjóri Haga, toppaðu það! En jæja, nú get ég allavega verslað í Krónunni án samviskubits.“

Í gær var tilkynnt um ráðningu tveggja nýrra stjórnenda hjá Högum og var Sesselía Birgisdóttir, sem tók við nýrri stöðu forstöðumanns nýsköpunar og markaðsmála, þar á meðal. Umræddar skipulagsbreytingar fela m.a. í sér að verkefni samskiptastjóra munu færast yfir til Sesselíu.

Í samtali við Vísi segir Særún að hún hafi látið af störfum hjá fyrirtækinu um leið og tilkynnt var um uppsögn hennar á sl. mánudag. Hún hafi fengið þær skýringarnar á uppsögninni að hún væri tilkomin vegna skipulagsbreytinga sem Finnur Oddsson, forstjóri Haga, standi á bakvið.

Segir hún jafnframt í samtalinu við Vísi að uppsögnin hafi komið henni á óvart en hún líti þó björtum augum til framtíðar.