*

laugardagur, 26. september 2020
Erlent 10. desember 2019 08:01

Sagt upp vegna smygls

Forstjóra ríkisflugfélags Indónesíu hefur verið sagt upp störfum fyrir að hafa ekki tilkynnt um innflutning á þremur mótorhjólum.

Ritstjórn
Ari Askhara, fráfarandi forstjóri Garuda.
epa

Ari Askhara, forstjóri indónesíska ríkisflugfélagsins Garuda hefur verið sagt upp störfum hjá félaginu fyrir að hafa smyglað Harley Davidson mótorhjóli auk tveggja annarra mótorhjóla til landsins. Þetta kemur fram í frétt BBC.

Samkvæmt fjármálaráðherra Indónesíu kom Askhara sér frá því greiða toll upp á 107.000 dollara með smyglinu. Hjólin voru flutt til Indónesíu frá Frakklandi en allir ferlar smyglsins fóru í gegn um Garuda auk þess sem greiðsla fyrir þau var framkvæmd af fjármálastjóra félagsins í Amsterdam. 

Þegar fyrst komst upp um smyglið lá ekki ljóst fyrir hvort Askhara, sem tók við starfi forstjóra í september árið 2018 yrði sagt upp störfum eða ekki. Nú liggur hins vegar ljóst fyrir að smyglið hefur kostað hann starfið

Garuda hefur verið undir smásjá yfirvalda í Indónesíu síðustu misseri en í júní á þessu ári var félaginu gert að vinna ársuppgjör sitt upp á nýtt vegna bókhaldsmistaka.