Dominique Strauss-Kahn þurfti að gangast undir ströng skilyrði til að losna úr fangelsi í fyrradag. Fyrrum fostjórinn lagði fram sem tryggingu eina milljón dala í reiðufé auk skuldabréfs að andvirði fimm milljón dala.
Jafnframt gekkst hann við afar ströngu eftirliti, sólarhringsgæslu, vöktun með myndavélum og öklaband sem í er innbyggt staðsetningartæki.
Saksóknarinn í New York kannar vísbendingar um fleiri afbrot Strauss-Kahn. Lögregla hefur rætt við fleiri konur sem kunna að hafa átt samneyti við hann.
Mikil umræða hefur verið í bandarískum fjölmiðlum undanfarna sólarhringa um mál Strauss-Kahn. Í gærkvöldi ræddu Eliot Spitzer fyrrum ríkisstjóri og saksóknari í New York og Mark Geragos lögmaður um málið á CNN. Fóru þeir nokkuð nákvæmlega yfir málavexti en þeir eru sammála um að möguleg lífsýni geti haft mikil áhrif á niðurstöðuna í sakamálinu.
Spitzer, sem nú er þáttastjórnandi á CNN, þurfti að segja af sér embætti ríkisstjóra árið 2008 eftir að hafa greitt 22 ára konu fyrir kynlífsþjónustu.
