Haustið og veturinn 2009 voru gerðir hluthafasamningar í tengslum við hlutafjáreign í Landsbankanum hf., Íslandsbanka hf. og Arion banka hf., milli íslenska ríkisins annars vegar og gömlu bankanna hins vegar. Á vef fjármálaráðuneytisins er þetta samkomulag nú birt í heild sinni. Áður hafði fjármálaráðherra birt helstu atriði samninganna í skýrslu sem lögð var fyrir Alþingi í mars 2011.
Hlutafjárframlög ríkisins vegna bankanna þriggja nema um 135 milljarða kr., á móti 156 milljörðum .kr. hlutafjárframlagi annarra hluthafa.
Hér að neðan eru tenglar á samningana eins og birt er á heimasíðu fjármálaráðuneytisins:
- Hlutafjársamkomulag vegna NBI (nú Landsbankans). Landskil ehf. fara með 18,7% eignarhlut í Landsbankanum fyrir hönd Landsbanka Íslands hf., á móti 81,3% hlut íslenska ríkisins.
- Hlutafjársamkomulag vegna Nýja Glitnis (nú Íslandsbanka) . ISB Holding ehf. fer með 95% eignarhlut í Íslandsbanka fyrir hönd Glitnis banka hf., á móti 5% hlut íslenska ríkisins. o Sjá einnig breytingu á ákvæði 14.4(a)
- Hlutafjársamkomulag vegna Nýja Kaupþings (nú Arion banka) . Kaupskil ehf. fara með 87% eignarhlut í Arion banka fyrir hönd Kaupþings banka hf., á móti 13% hlut íslenska ríkisins.
Á heimasíðu fjármálaráðuneytisins segir að með hluthafasamkomulagi megi koma í veg fyrir deilur milli hluthafa, ákveða hvernig stjórn félags skuli háttað, fjármögnun þess, hvernig nýir hluthafar geti komið að félaginu, takmarkanir á sölu hlutafjár og fleira.