Í verðsamráði olíufélaganna var þeim ekkert óviðkomandi segir í skýrslu Samkeppnisstofnunar. Auk þess að fjalla sameiginlega um verðlagningu á eldsneyti og öðrum olíuvörum fjölluðu olíufélögin sín á milli um að leggja afgreiðslugjöld á viðskiptavini vegna dreifingar á eldsneyti, taka upp gjöld vegna tanka og annars búnaðar, leggja á flutningsgjald vegna smárra sendinga og útskriftar- og færslugjald til að mæta kostnaði við sendingu reikninga og gíróseðla eins og segir í skýrslunni.
Þá hittust félögin á fundum til að takmarka afslátt til viðskiptavina og Olís og Skeljungur samræmdu m.a. afslátt sinn til Slysavarnafélags Íslands á Vestfjörðum. Jafnvel gekk samstarf olíufélaganna svo langt að þau ráðfærðu sig hvert við annað um jólagjafir til starfsmanna og styrki í tilefni sjómannadagsins svo dæmi séu tekin. Þá samþykktu olíufélögin í sameiningu hver yrði hámarksstyrkur sem hvert félag mundi veita myndlistarmanni nokkrum sem sótt hafði um styrk til þeirra allra!
