*

föstudagur, 21. janúar 2022
Innlent 3. desember 2021 15:57

Samskip kærði sátt Eimskips og SKE

Áfrýjunarnefnd samkeppnismála hefur vísað frá kæru Samskipa vegna sáttar Eimskips og Samkeppniseftirlitsins.

Ritstjórn

Áfrýjunarnefnd samkeppnismála hefur vísað frá kæru Samskipa þar sem flutningafyrirtækið krafðist þess að liður í sátt Eimskips og Samkeppniseftirlitsins, vegna samráðs Eimskips og Samskipa á árunum 2008-20013, yrði felldur úr gildi. Úrskurðinn má finna hér.

Samkvæmt sáttinni, sem tilkynnt var um 16. júní síðastliðinn, viðurkenndi Eimskipi samskipti og samráð við Samskip á umræddu tímabili og að sú háttsemi hefði falið í sér alvarleg brot gegn samkeppnislögum og EES-samningnum. Eimskip féllst á að greiða 1.500 milljóna króna stjórnvaldssekt.

Samskip kærði ákvörðun ákvörðun SKE þann 13. júlí síðastliðinn og krafðist þess að málsgrein sem kveður á um að eigi Eimskip viðskiptalegt samstarf við Samskip þá skuldbindi félagið sig til þess að hætta því“. Í því felst einnig að Eimskip skuldbindi sig til þess að eiga ekki í samstarfi við önnur fyrirtæki í hvers konar flutningaþjónustu ef Samskip eiga einnig í samstarfi við viðkomandi fyrirtæki, nema í þeim tilfellum þar sem hægt sé að sýna fram á að eðlisamstarfsins raski ekki samkeppni á milli Eimskips og Samskips.

Sjá einnig: Þröskuldur Eimskips færi illa með Samskip

Samkvæmt frétt á vef eftirlitsins segir að Samskip telji fyrirmælin fela í sér ólögmæta takmörkun á samnings- og atvinnufrelsi fyrirtækisins sem styrkti markaðsráðandi stöðu Eimskips en veikti stöðu Samskipa.

Samkeppniseftirlitið krafðist þess fyrir áfrýjunarnefndinni að kærunni yrði vísað frá þar sem skuldbinding Eimskips væri „bæði lögmæt og nauðsynleg í ljósi þeirra alvarlegu brota gegn samkeppnislögum sem Eimskip hefði viðurkennt“.

Í úrskurði áfrýjunarnefndarinnar kemur fram að „sá sem gerir sátt í máli [hafi] forræðið á því að undirgangast skilyrði og stjórnvaldssekt til að koma í veg fyrir frekari brot og efla samkeppni og þá með hans eigin hagsmuni að leiðarljósi. Eðli málsins samkvæmt hefur slík sátt alla jafnan í för með sér takmörkun á samstarfi þeirra aðila sem sætt hafa rannsókn í máli vegna ólögmæts samráðs.“

Áfrýjunarnefndin féllst ekki á að Samskip ætti rétt á að koma að gerð sáttarinnar við Eimskip og geti því ekki borið umrætt ákvæði sáttarinnar undir áfrýjunarnefndina. Í þessu sambandi var tekið fram að þætti Samskipa væri enn ólokið. Taldi áfrýjunarnefnd því óhjákvæmilegt að vísa kæru Samskipa frá nefndinni.