Björn Bjarnason, dómsmálaráðherra, og Thad W. Allen, yfirmaður bandarísku strandgæslunnar, rituðu í gær undir yfirlýsingu um samstarf strandgæslunnar og Landhelgisgæslu Íslands á fundi í Washington.

Þetta kemur fram í tilkynningu frá dómsmálaráðuneytinu.

Yfirlýsingin byggist á samkomulagi Bandaríkjanna og Íslands frá 11. október 2006 um öryggis- og varnarmál, en þar eru ákvæði um samstarf borgaralegra stofnana landanna á sviði öryggismála.

Þá kemur fram að samkvæmt yfirlýsingunni munu strandgæslan og landhelgisgæslan styrkja samstarf sitt á ýmsum sviðum, svo sem við leit og björgun, stjórn á siglingum, mengunareftirlit á hafinu og almenna öryggisgæslu þar.

Þá er einnig gert ráð fyrir sameiginlegri þjálfun og menntun starfsmanna eftir því sem nauðsynlegt er til að treysta samstarfið sem best.