Félagsmálaráðherra greindi frá því í gær að ákveðið hefur verið að hækka lánshlutfall Íbúðalánsjóðas í 90% á ný úr 80%. Vilhjálmur Egilsson, framkvæmdastjóri Samtaka atvinnulífsins gagnrýnir ákvörðunina og segir hana afleik.
"Félagsmálaráðherra lék mikinn afleik með því að hækka á ný lánshlutfall og fjárhæðamörk hjá Íbúðalánasjóði. Við gerð kjarasamninga þann 22. júní síðastliðinn lögðu Samtök atvinnulífsins mikla áherslu á lækkun lánshlutfallsins til þess að stemma stigu við síhækkandi íbúðaverði og tryggja lækkun verðbólgunnar. Hækkun lánshlutfalls í 90% og hámarksláns í 18 milljónir gengur þvert á ákvörðun ríkisstjórnarinnar í kjölfar kjarasamninganna og á eftir virka sem verðbólgufóður engum til gagns," segir Vilhjálmur.
"Hækkun lánshlutfalls og hámarksláns Íbúðalánasjóðs nú er ekki síst afleikur í því ljósi að kostnaður vegna íbúðahúsnæðis hækkaði um 1,8% í janúar og skýrði alfarið hækkun á vísitölu neysluverðs í byrjun febrúar," bætir hann við.
Vilhjálmur segir ráðstöfunina þeim mun bagalegri þar sem nú í dag hinn 1. mars tekur gildi lækkun virðisaukaskatts á matvæli og fleiri vörur auk tollalækkana á búvörum og niðurfellingar ýmissa vörugjalda á matvæli.
"Verð á matvælum, veitingaþjónustu og nokkrum öðrum vörum lækkar af þeim sökum. Þessar aðgerðir eru að lang mestu leyti skref í rétta átt til þess að bæta skattkerfið og lækka þar að auki útgjöld heimilanna. Þær koma fram í lægri verðbólgumælingu nú en hafa þó ekki áhrif á verðbólguna til lengdar þótt aukin eftirspurn geti falið í sér ákveðna verðbólguhættu en það sama má reyndar segja um allar skattalækkanir," segir Vilhjálmur.
Samtök atvinnulífsins telja einstakt tækifæri hafa myndast á þessu ári til þess að festa efnahagslegan stöðgugleika í sessi fyrir næstu ár. Samtökin reikna með því að ný uppsveifla hefjist í síðasta lagi á næsta ári og telja brýnt að hafa náð verðbólgunni vel niður.
"Ef hún verður yfir 2,5% verðbólgumörkum Seðlabankans þegar uppsveiflan hefst verður hún viðvarandi yfir þessum mörkum árum saman og þá er alvarlega vegið að efnahagslegum stöðugleika á Íslandi og þeim grundvelli sem atvinnulífið hefur byggt á. Ljóst er að lítið má útaf bregða í hagstjórninni til þess að verðbólgan fari ekki á skrið ekki síst vegna þess að Seðlabankinn hefur málað sig út í horn með viðvarandi háu vaxtastigi sem er á góðri leið með að verðleggja krónuna út af markaðnum í lánsviðskiptum," segir Vilhjálmur.
