Efnahagssvið SA segir að peningaprentun og uppkaup Seðlabankans á gjaldeyri dragi úr virkni peningastefnunnar og stuðli að aukinni verðbólgu.
Seðlabankinn hefur keypt gjaldeyri sem nemur meira en 200 milljörðum króna á þessu ári. „Í raun hefur innflæði gjaldeyris verið með þeim hætti að Seðlabankinn hefur meira og minna legið á kauphliðinni frá því í september 2013, þ.e. keypt gjaldeyri í skiptum fyrir íslenskar krónur til að koma í veg fyrir verulega styrkingu krónunnar," segir í greiningunni.
Prentvélarnar látnar ganga
„Inngrip Seðlabankans eru þó ekki án kostnaðar en Seðlabankinn greiðir gjaldeyriskaup sín með „peningaprentun“, m.ö.o. auka inngrip Seðlabankans peningamagn í umferð. Inngrip Seðlabankans eru um þessar mundir að mestu leyti óstýfð inngrip en það þýðir að Seðlabankinn grípur ekki til mótvægisaðgerða til að draga úr aukningu peningamagns. Þessu til viðbótar fylgir því kostnaður fyrir ríkið af miklum vaxtamun, einkum þegar stjórnvöld og í raun Seðlabankinn hafa lofað nánast óbreyttri krónu," segir jafnframt.
Í greiningunni segir að Seðlabankinn sé því í nokkuð undarlegri stöðu, þar sem hann sé annars vegar farinn að hækka stýrivexti og hefur boðð frekari vaxtahækkanir, en hins vegar auki hann á sama tíma peningamagn í umferð með uppkaupum á gjaldeyri. „
„Verðlagsáhrif þess að auka peningamagn í umferð eru þau sömu og ef Seðlabankinn lækkar vexti, því slíkt stuðlar að verðbólgu, lækkar virði krónunnar til lengri tíma litið og skapar þrýsting á markaðsvexti til lækkunar. Seðlabankinn er því m.ö.o. að draga úr áhrifum sinna eigin vaxtahækkana með inngripum á gjaldeyrismarkað."
