Ingólfur Arnarson, fjármálastjóri Kópavogsbæjar, segir að skuldir í tengslum við eignarnám á Vatnsenda árið 1999 hafi verið greiddar upp fyrir gjalddaga vegna óhagstæðra vaxtakjara. Það sé yfirlýst stefna bæjarins að nota lausfé til að greiða upp skuldir. Bærinn ákvað að greiða upp síðustu afborganir af verðtryggðum skuldabréfum vegna eignarnáms á Vatnsenda fyrir gjalddaga. Lánið var greitt upp í desember 2012 en síðasti gjalddagi skuldabréfanna er ekki fyrr en árið 2015.
Fyrr í þessum mánuði greindi Viðskiptablaðið frá uppgreiðslu Kópavogsbæjar á skuldum í tengslum við eignarnám 90,5 hektara lands á Vatnsenda árið 1999. Það ár og árið á eftir var samið við ekkju Magnúsar Hjaltested, föður Þorsteins Hjaltested, um 237 milljóna greiðslu vegna eignarnáms Kópavogsbæjar á landinu. Magnús var ábúandi á Vatnsenda. Hæstiréttur staðfesti fyrr á þessu ári að jörðin tilheyrði dánarbúi Sigurðar Hjaltested, afa Þorsteins.
Nánar er fjallað um málið í Viðskiptablaðinu. Áskrifendur geta nálgast blaðið hér .