„Ég hef haft þá skoðun að það sé of fjárfesting í fjarskiptakerfinu miðað við markaðinn eins og hann er í dag,“ segir Ómar Svavarsson, forstjóri Vodafone. Hann fullyrðir að samkeppnin á fjarskiptamarkaði hér á landi sé gríðarleg. Það sé mjög jákvætt. Samkeppnin hefur hins vegar komið niður á afkomu og skapað hættu á offjárfestingu hjá fjarskiptafyrirtækjum.
„Að mínu mati eru ekki mikil vaxtatækifæri á íslenskum fjarskiptamarkaði nema að menn sameinist, a.m.k. um tiltekna hluti í rekstrinum eða stækki,“ bætir hann við.
Þrátt fyrir markaðsaðstæður segist Ómar þó vera bjartsýnn þegar kemur að fjarskiptaiðnaðinum almennt.
„Þessi iðnaður er að breytast mikið og hratt og er að verða að gagnaflutningsiðnaði,“ bendir hann á. „Að því leyti erum við rétt að byrja og það er mikið framundan. Við hófum þá vegferð fyrir nokkrum árum að undirbúa fyrirtækið undir þessar breytingar á fjarskiptamarkaði – meðal annars með nýrri hugsun í þjónustuframboði, tilkomu sæstrengs o.fl. – enda sáum við fljótt margföldun á gagnanotkun.“
Ómar bendir á að gagnapakkarnir sem fyrirtækið bjóði upp á séu mun umfangsmeiri en þeir voru á sínum tíma. Meðalheimilið í dag noti til dæmis svip að gagnamagn og meðalfyrirtæki gerði á Íslandi fyrir fimm árum.
„Við erum að undirbúa okkur fyrir gagnaflutningsbyltinguna,“ segir Ómar að lokum. „Þar liggur framtíð markaðarins – og fyrirtækisins,“ segir Ómar Svavarsson.
Ítarlegt viðtal við Ómar má lesa í síðasta tölublaði Viðskiptablaðsins. Áskrifendur geta nálgast blaðið undir liðnum tölublöð hér .