Ásta S. Fjeldsted, framkvæmdastjóri Viðskiptaráðs gagnrýnir Oddýju G. Harðardóttur, þingmann Samfylkingarinnar, á Facebook og segir hana koma með staðhæfingar sem eigi ekki rök að styðjast.

Í pistli á Vísi þann 25. júní sl. segir Oddný G. Harðardóttir um frumvarp sem nú liggur fyrir á alþingi um breytingar á Samkeppnislögum að þar sé að finna ýmis „vafasöm atriði“ og tekur þar sérstaklega fram að „Verði frumvarpið að lögum mun það auðvelda samruna stórra fyrirtækja, þ.e.a.s. veltumörk tilkynningaskyldra samruna eiga að hækka verulega þannig að stórir samrunar verða ekki tilkynningaskyldir.“ Þá segir hún einnig í viðtali í Morgunblaðinu sama dag að um sé að ræða „drastískar breytingar” á veltiviðmiðunum.

Ásta segir í Facebook færslunni að eins og lögin standi núna þurfa fyrirtæki sem sjá hag sínum best borgið með sameiningu að tilkynna samrunann til Samkeppniseftirlitsins ef a.m.k. tvö fyrirtækjanna hafa yfir 200 milljóna króna ársveltu hér á landi og samanlögð ársvelta allra fyrirtækja sem vilja sameinast er a.m.k. tveir milljarðar króna.

„Mikilvægt er hér að taka fram að ef fyrirtæki uppfylla ekki þessi skilyrði hefur Samkeppniseftirlitið engu að síður heimild til að taka samruna til skoðunar sé hann líklegur til að geta dregið verulega úr virkri samkeppni," segir í færslunni.

„Í fyrsta lagi er það staðreynd að þessi veltuviðmið hafa haldist óbreytt frá 2008 þrátt fyrir að verðlag hafi hækkað og hagkerfið stækkað með auknum efnahagsumsvifum. Segja má þannig að veltuviðmiðin hafi lækkað um nærri helming án þess að tekin hafi verið ákvörðun um það – og þar með fleiri smærri fyrirtækjum gert skylt að tilkynna um samruna. Í öðru lagi og beinu framhaldi af fyrri punkti hafa þessi óbreyttu viðmið valdið því að tími eftirlitsins sem fer í samrunamál hefur farið hratt vaxandi á milli ára þar sem þau eru lögbundin forgangsmál hjá eftirlitinu – en árið 2018 var 40% af tíma Samkeppniseftirlitsins varið í samruna sem er um helmingi hærra hlutfall en árið 2011, þegar 21% tíma eftirlitsins fór í samruna. Málsmeðferðartími Samkeppniseftirlitsins hefur verið talsvert gagnrýndur af hálfu fyrirtækja þar sem erfitt hefur reynst fyrir fyrirtæki að sjá fyrir með einhverri vissu hvenær niðurstaða eftirlitsins berst. Að auki sýna nýjustu niðurstöður úttektar IMD háskólans um samkeppnishæfni landsins að úrbóta er þörf á skilvirkni samkeppniseftirlits hér á landi."

Að lokum segir Ásta að lagabreytingin sem nú liggi fyrir hvað veltumörkin varðar sé því nauðsynleg; að veltuviðmiðin séu hækkuð a.m.k. upp í sömu upphæð og þau voru 2008 á verðlagi dagsins í dag.

„Í framhaldinu væri síðan rétt að viðmiðin hækkuðu samhliða aukningu á landsframleiðslu, sem endurspeglar bæði verðbólgu og stækkun atvinnulífsins og þar með markaða. Sé litið til annarra Evrópulanda er ljóst að veltumörk þeirra samkeppnislaga eru endurskoðuð með reglulegu millibili og uppfærð með tilliti til umfangs viðskipta og aukningu sem skilað hefur sér út í hagkerfið. Sama fyrirkomulag ætti að eiga við hérlendis."