*

miðvikudagur, 26. júní 2019
Innlent 24. janúar 2011 13:29

Segir samtalið við Mervyn King til á bandi

Davíð Oddsson segir í viðtali í Áramót, tímariti Viðskiptablaðsins, að samtal við Mervyn King um Icesave sé til á bandi.

Gísli Freyr Valdórsson
„Mér þótti mjög vænt um að heyra þetta og þakkaði honum vel fyrir. Þetta samtal er til á bandi,“ sagði Davíð Oddsson í viðtali við Viðskiptablaðið.
Birgir Ísl. Gunnarsson

Í Áramótum, tímariti Viðskiptablaðsins sem kom út í lok desember sl., staðfestir Davíð Oddsson að Mervyn King bankastjóri Englandsbanka hafi í samtali við Davíð sagt að Englandsbanki myndi ekki gera þá kröfu að innstæður á Icesave-reikningunum yrðu endurgreiddar af Íslendingum. Þetta kom fyrst fram í bók Árna M. Mathiesen, fyrrverandi fjármálaráðherra, sem kom út fyrir jólin.

Guardian hefur eftir talsmanni Englandsbanka að „ásakanirnar séu algjörlega ósannar“ og að King hafi lengi lagt áherslu á að Seðlabanki Íslands dragi úr umsvifum bankakerfisins.

Hér að neðan má lesa bút úr viðtalinu við Davíð sem birtist í Áramót.

Bankastjóri Englandsbanka vildi afskrifa Icesave

Nú er Icesave-málið í umræðunni, önnur jólin í röð, en málið er enn óleyst og mikið óvissa um framhaldið. Flestir vita hvernig það stendur í dag en það er enn margt órætt varðandi aðdraganda þess. Þannig er haft eftir Davíð í bók Árna M. Mathiesen, fyrrverandi fjármálaráðherra, sem kom út nú fyrir jól, að Mervyn King, bankastjóri Englandsbanka, hafi í samtli við Davíð í aðdraganda hrunsins, sagt að Icesave-krafan yrði afskrifuð. Samkvæmt frásögn Árna á Davíð að hafa komið þessum skilaboðum til þáverandi ríkisstjórnar.

Aðspurður um þetta staðfestir Davíð þessa frásögn. King hafi í samtali við hann sagt að Englandsbanki myndi ekki gera þá kröfu að innstæður á Icesave-reikningum yrðu endurgreiddar af Íslendingum.

„Mér þótti mjög vænt um að heyra þetta og þakkaði honum vel fyrir. Þetta samtal er til á bandi. Við vorum nú ekki vanir að taka svona samtöl upp en við gerðum það einhverra hluta vegna í þetta skipti,“ segir Davíð.

„Utanríkismálanefnd Alþingis bað um þessa upptöku eftir að ég fór úr Seðlabankanum en þá sagðist bankinn ekki geta afhent hana nema með samþykki Englandsbanka. Ég átta mig nú ekki alveg á þeirri niðurstöðu því að þegar lögin voru sett um rannsóknarnefnd Alþingis þá áskildu menn sér rétt til að láta allar upplýsingar af hendi, öll bankaviðskipti og hvaðeina. Þetta hefur mikið vægi í þessu mikilvæga máli.“

Þá segir Davíð að sér sé ekki kunnugt um að Seðlabankinn hafi nokkurn tíma beðið Englandsbanka um leyfi til að láta upptökuna af hendi þannig að ekkert liggi fyrir um afstöðu Englandsbanka til þess.

„Stóra málið í þessu er að þetta var einhliða ákvörðun Breta og Hollendinga að greiða út allar innstæður á Icesave-reikningunum,“ segir Davíð.

„Það gerðu þeir án þess að spyrja okkur af ótta við það að ef í ljós kæmi að þúsundir manna væru að tapa peningum á sparireikningum yrði gert áhlaup á alla þeirra banka. Þeir greiddu þetta út og komu í veg fyrir bankaáhlaup, þannig að þessi aðgerð þeirra gekk mjög vel upp og sparaði þeim gífurlega peninga. Síðan datt þeim allt í einu í hug að rukka Íslendinga um þessi „lán“ sem þeir áttu að hafa veitt. Ég hef aldrei tekið lán og fengið bara að vita um það eftir á. Þetta er alveg galið.“

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is