*

þriðjudagur, 3. ágúst 2021
Innlent 28. nóvember 2013 08:55

Segir skuldaniðurfellingu skyndilausn

Lars Christensen hjá Danske Bank segir íslenska stjórnmálamenn ekki horfa til framtíðar.

Ritstjórn
Haraldur Guðjónsson

Vandinn við íslenska stjórnmálamenn er að þeir velja alltaf skyndilausnir, að sögn Lars Christensen, aðalhagfræðings Danske Bank í Danmörku. Hann segir engu skipta hvar á pólítíska litrófinu stjórnmálamennirnir standa, til hægri eða vinstri. „Þannig var í pottinn búið þegar allt var á uppleið á Íslandi. Þá vildi engin horfa til framtíðar. Þannig er jafnframt í pottinn búið í dag, þar sem stjórnmálamenn eru æstir í að senda öllum tékka til þess að tryggja vinsældir sínar til næstu ára,“ segir hann í samtali við Bloomberg-fréttuna. Lars Christensen setur fyrirvara við aðgerðir stjórnvalda gegn skuldavanda heimilanna. Líta megi á aðgerðirnar sem verðlaun fyrir að skuldasetja sig um of. Fleiri gjalda varhug við aðgerðunum, þar á meðal Efnahags- og framfarastofnunin (OECD) sem mælir fremur með því að vextir verði hækkaðir og mælir með því að haldið verði áfram að hjálpa þeim sem þurfi á aðstoð að halda.

Bloomberg-fréttaveitan fjallar um leiðir ríkisstjórnarinnar til að færa niður verðtryggðar skuldir landsmanna. Hópur sérfræðinga á vegum ríkisstjórnarinnar hefur unnið að tillögum að aðgerðum og á að skila þeim fyrir mánaðamótin. VB.is hefur sagt líkur á að það verði gert í dag. Morgunblaðið sagði í morgun forystumenn stjórnarflokkanna horfa til þess að skuldir lækki um í kringum 130 milljarða króna.

Bloomberg rifjar upp að verðtryggðir skuldir heimila landsins hafi rokið upp þegar verðbólga fór á skrið í efnahagshruninu. Bent er á að í lok júní á þessu ári hafi skuldirnar numið 1.100 milljörðum króna.

Fjallar er ítarlega um aðgerðir ríkissstjórnar í Viðskiptablaðinu sem kom út í dag. Áskrifendur geta nálgast blaðið hér að ofan undir liðnum tölublöð.