Hagfræðistofnun Háskóla Íslands skilaði í gær af sér skýrslu um mjólkurvöruframleiðslu á Íslandi, en samkvæmt niðurstöðum hennar greiðir íslenskur almenningur átta milljarða króna á ári í stuðning til innlendrar mjólkurframleiðslu. Í skýrslunni kemur einnig fram að á árunum 2011 til 2013 hafi íslensk mjólk verið að jafnaði 30% dýrari en innflutt mjólk hefði verið. Er meðal annars lagt til að tollar verði lækkaðir svo framleiðsla grannlandanna verði samkeppnisfær við íslenskar mjólkurafurðir hér á landi.
Sigurður Ingi Jóhannsson landbúnaðarráðherra sagði í viðtali á RÚV í gær að stjórnvöld væru að leita leiða til að lækka tolla og auka innflutning á matvælum. Í tilkynningu frá Félagi atvinnurekenda segir að ráða megi af orðum ráðherrans að það strandi helst á því að Evrópusambandið sé alltaf að fresta fundum við ráðherrann.
Páll Rúnar M. Kristjánsson, lögmaður Félags atvinnurekenda, segir að innflutningstollar séu skattur í skilningi stjórnarskrár og slíkir skattar séu aðeins lagðir á og teknir af með lögum. „Lög þessi eru svo sett af Alþingi. Evrópusambandið hefur þar enga aðkomu. Valdið er því hjá Alþingi og engum öðrum. Það er því ekkert mál að ná fram þessum mikla ábata fyrir neytendur án frekari tafa,“ segir Páll Rúnar.
Hann segir það svo sjálfstætt umhugsunarefni að velferð íslenskra neytenda sé gerð að skiptimynt í milliríkjasamningum um fjárhagslega hagsmuni fámenns hóps fyrirtækja sem þiggi þá háu fyrirgreiðslu úr hendi neytenda sem hér um ræði.
