Ástralski frumkvöðullinn Craig Wright hefur nú stigið fram og segist vera skapari rafmyntarinnar Bitcoin. Hingað til hafði hann starfað undir dulnefninu Satoshi Nakamoto. Þetta kemur fram á vef fréttaveitunnar BBC í dag. Wright segist hafa stigið fram nú til þess að eyða vangaveltum um hver raunverulegur skapari rafmyntarinnar sé.
Samstarfsmenn hans og þróunarteymi Bitcoin þess hafa staðfest fullyrðingu Wright. Yfirlýsingar hans hafa þó ekki sannfært alla og á vef the Economist er m.a. ritað að enn eigi eftir að gera grein fyrir ýmsum mikilvægum atriðum svo hægt sé að sanna að hann sé rauverulega Satoshi Nakamoto.
Grunur hafði leikið á að Wright væri raunverulegur skapari bitcoin. Á mbl.is er rifjað upp að tímaritin Wired og Gizmodo birtu umfjallanir þess efnis í desember og byggðu á gögnum sem talið er að hafi verið stolið frá honum. Í kjölfarið gerðu áströlsk yfirvöld húsleit á heimili hans að beiðni skattsrannsóknastjóra.
Viðskiptablaðið fjallaði ítarlega um málið á sínum tíma. Nakamoto, eða Wright, var þá meðal þeirra sem tilnefnd voru til Nóbelsverðlauna í hagfræði - en hugmyndin að baki rafmyntarinnar, hið svokallaða Blockchain, hefur verið talin byltingarkennd fyrir fjármálaheiminn í heild sinni. Stórir bankar og fjármálafyrirtæki hafa þegar byrjað að þróa útgáfur af kerfinu.
