*

sunnudagur, 19. september 2021
Erlent 4. ágúst 2021 07:18

Segja falsfréttum stríð á hendur

Twitter hefur samstarf við tvær af stærstu fréttaveitum heims til að stemma stigu við falsfréttaflóði innan miðilsins.

Ritstjórn
epa

Samfélagsmiðillinn Twitter hefur greint frá samstarfi við tvær af stærstu fréttaveitum heims, Reuters og the Associated Press. Er samstarfinu ætlað að draga úr falsfréttaflóði inni á samfélagsmiðilinum. BBC greinir frá.

Munu fréttaveiturnar m.a. aðstoða Twitter við að bæta aðgengi notenda að bakgrunnsupplýsingum, ásamt því að setja atburði sem mest fer fyrir hverju sinni inni á miðlinum í samhengi.

Segir Twitter að samstarfið geri miðlinum kleift að ganga úr skugga um að hnitmiðaðar og áreiðanlegar upplýsingar um atburði séu áberandi í umræðunni jafn skjótt og staðreyndir máls liggja fyrir.

Í dag vinnur sérstakt teymi hjá Twitter við að koma á framfæri meðal notenda samfélagsmiðilsins áreiðanlegum upplýsingum um tiltekna atburði, frá áreiðanlegum fjölmiðlum. Er þetta gert til þess að bregðast við röngum eða misvísandi upplýsingum sem hafa farið á flug inni á miðlinum.

Er ofangreindu samtarfi ætlað að flýta umræddu ferli enn frekar. 

Stikkorð: Twitter falsfréttir