Með því að beita löggjafarvaldinu í ríkara mæli og meðal annars afnumið tafarlaust undanþágu sem heimilar vaxtagreiðslur til erlendra aflandskrónueigenda í gjaldeyri gætu stjórnvöld styrkt stöðu sína enn frekar gagnvart kröfuhöfum í þrotabú föllnu bankanna.
Þetta kemur fram í lögfræðiáliti sem Íslög hafa unnið en fjallað er um málið í Morgunblaðinu í dag. Lögfræðiálitið er unnið af þeim Ástríði Gísladóttur og Sigurði Snædal Júlíussyni fyrir þann hóp sem stendur að baki vefsíðunni snjohengjan.is en þar fer Róbert Wessmann, forstjóri Alvogen, fremstur í hópi. Í fréttinni kemur fram að stefnt sé að því að kynna lögfræðiálitið fyrir forsvarsmönnum nýrrar ríkisstjórnar á næstu dögum.
Þá greinir Morgunblaðið frá því að mikilvægustu skrefin sem stjórnvöld gætu tekið er í fyrsta lagi það að breyta lögum þannig að Glitnir og Kaupþing verði settir í greiðsluþrot náist ekki að klára nauðasamninga fyrir næstu áramót. Í öðru lagi þannig að einungis yrði hægt að greiða út úr þrotabúunum í íslenskri mynt og loks að afnema þær undanþágur sem eru í gildi varðandi þær íslensku krónur sem eru fastar á höfuðbók 27 í Seðlabanka Íslands og bera vexti. Undanþága í dag heimilar erlendum krónueigendum að flytja úr landi vaxtagreiðslur í gjaldeyri.
Sem fyrr segir er nánar fjallað um þetta í Morgunblaðinu í dag.
