Seðlabankinn hvetur útflytjendur og aðra sem eiga gjaldeyri eindregið til að bjóða hann til sölu á tilboðsmarkaði fyrir gjaldeyri í þeim tilgangi að auka veltu og styrkja verðmyndun.
Þetta kemur fram í tilkynningu frá Seðlabankanum.
Bankinn segir viðkomandi aðila geta snúið sér til fjármálafyrirtækja sem eiga viðskipti við Seðlabankann og falið þeim að koma tilboðum sínum á framfæri.
„Verðmyndun utan tilboðsmarkaðar er til þess fallin að seinka heilbrigðum viðskiptaháttum með gjaldeyri og skaða tilraunir til að koma þeim í eðlilegt horf. Auk þess eru utanmarkaðsviðskipti ógagnsæ og áhættusöm,“ segir í tilkynningu Seðlabankans.
Í tilkynningu bankans kemur fram að vegna hinna sérstöku aðstæðna sem upp komu í rekstri banka nú í október lögðust niður viðskipti á millibankamarkaði með gjaldeyri. Á þeim markaði sinntu stóru viðskiptabankarnir þrír hlutverki viðskiptavaka samkvæmt reglum um tíðni tilboða, verðmyndun og fleira.
Í staðinn kom Seðlabankinn upp svonefndum tilboðsmarkaði fyrir gjaldeyri, samanber tilkynningu á heimasíðu bankans 15. október síðastliðinn.
Á þeim markaði eru fleiri fjármálafyrirtæki en við fyrri skipan en taka ekki á sig skyldur viðskiptavaka. Niðurstöður um viðskipti og verð eru birtar daglega á heimasíðu Seðlabankans.
Fjármálafyrirtæki sem starfsleyfi hafa samkvæmt lögum um fjármálafyrirtæki geta stofnað viðskiptareikning í Seðlabanka Íslands og átt við hann viðskipti.
Þau sem það hafa gert eru:
- NBI (Nýi Landsbanki),
- Nýi Glitnir banki,
- Nýi Kaupþing banki,
- Straumur fjárfestingarbanki,
- Sparisjóðabankinn,
- Byr sparisjóður,
- Sparisjóður Reykjavíkur og nágrennis,
- Sparisjóðurinn í Keflavík,
- Sparisjóður Suður-Þingeyinga,
- Sparisjóður Strandamanna,
- Sparisjóður Vestmannaeyja,
- Sparisjóðurinn Dalvík,
- Sparisjóður Höfðhverfinga,
- VBS fjárfestingarbanki,
- MP fjárfestingarbanki,
- Saga Capital,
- Askar Capital,
- Frjálsi fjárfestingarbankinn,
- Lánasjóður sveitarfélaga,
- Borgun
- og Valitor.